Шукерте огыл Воронежыште кок тӱрлӧ турист премийым пуымо торжественный мероприятий эртен.
Элнан 41 регионжо гыч 67 кумдыкын еҥже-влак лийыныт. Козьмодемьянск ола Гран-прим сеҥен налын гын, Йошкар-Ола икымше вер дене палемдалтын.
А теве «Туризман да унам вашлийше регионо-влак» IV всероссийский премийын конкурсыштыжо Марий Эл «Этнокультурный туризман регион» номинацийыште Гран-прим сеҥен налын. Туротрасльын еҥже-влак марий калыкын национальный пайремже-влаклан пӧлеклалтше программым ончкытеныт. Иктыже Пеледыш пайрем лийын. Таклан огыл Йошкар-Олаште кажне ийын эртаралтше ты пайремым ончалаш уна-влак уло Россий гыч лӱмын толын каят. Презентаций сынан программым ончыкташ Тамара Дмитриева лӱмеш «Эрвел марий» мурышо да куштышто калык ансамбль полшен.
Светлана Носова
Снимкыште: премийым налаш мийыше-влак.
Фотом «Туризм в Марий Эл» воткыл лаштык гыч налме.
