6 апрельыште Йошкар-Олаште, Бауман лицей пеленысе «Лира» йоча сымыктыш школышто, йоча да самырык-влакын усталыкыштын «Руки сердечное тепло» XI межрегиональный инклюзивный фестиваль-конкурс эртен.
Тушко Марий Эл деч посна Киров, Свердлов, Ярославль областьла, Чебоксар, Ульяновск, Киров олала гыч 600 утла ӱдыр-рвезе-влак толыныт. Нуно тыгай номинацийлаште мастарлыкыштым ончыктеныт: вокал (эстраде, калык, академический), семӱзгар-влак дене шоктымаш (фортепиано, струнно-смычковый, духовой, калык инструмент, синтезатор да т.м.), хореографий.
Конкурсышто участник-влакын усталыкыштым ийгот шот дене кум тӱшкалан шелын акленыт: 7-11, 12-15 да16-20 ияш-влак.
Звенигово район Кожласола гыч Карина Ватютовам шукынжо изи Карина семын палат. Тиде конкурсыш тудо икымше ий гычак ушна. Коважын, Лидия Пантелеевнан, палдарымыж почеш, тунамак, 11 ий ончыч, икымше верым сеҥен налын. Але марте кум гана гран-при дене палемдалтын!
Карина кеҥежым 18 ийым тема. Шке тӱшкаштыже, 16-20 ияш-влак коклаште, теният гран-прим сеҥен налын! А тылеч ончыч тиде 2023 ийыште лийын.
Ты гана ӱдыр «эстраде вокал» да «калык вокал» номинацийлаште ойыртемалтын. Икымшыштыже «Расцветай, моя Россия», весыштыже Медведево вел уна мурым мурен. Нуным иктеш ушен, жюри ик кӱкшӧ сеҥымаш дене палемден. Саламлена!
Мут толмашеш ойлаш гын, июльышто Карина Ватютовам ик фольклор ансамбль дене пырля Абхазийыш Сухуми олаште эртышаш «Алтын Майдан» тӱнямбал фольклор фестивальыш ӱжыныт.
