Марий Элын сулло артистше, драматург, икмыняр книган авторжо Валерий ГРИГОРЬЕВ 70 ияш лӱмгечыжым 4 январьыште Марий самырык театрын сценыштыже «Рошто уна» пьесыж почеш шындыме спектакль дене палемден.
«Рошто уна» постановкыжо (режиссёржо – Олег Иркабаев) калыкын йӱла пайремжын ойыртемжым почын пуа.
Постановко деч вара юбилярым театрын коллективше, Марий тӱвыра рӱдерын ончычсо пашаеҥже да йолташыже-влак саламленыт.
6 январьыште тиде спектакльым артист-влак шочмо Провой кундемыштыжат модын ончыктеныт.
Справке:
Провой кундемын чолга эргыже культпросветучилищыште шинчымашым налмеке, Республикысе курчак театрыште, М.Шкетан лӱмеш Марий национальный драме театрыште артистлан тыршен. ГИТИС-ым тунемын лекме деч вара марий драмтеатрышкак пӧртылын.
1991-1999 ийлаште Марий самырык театрыште ятыр спектакльыште рольым модын, тӱрлӧ образым чоҥен, режиссёр семынат икмыняр постановкым сценыш луктын.
Республикысе марий тӱвыра рӱдерым вуйлатыме жапыште (1999-2015 ийла) калыкнан тӱвыражым, йӱлажым да ыштыш-кучышыжым аралыме, вияҥден колтымо да ты пашашке самырык тукымым ушымо сомыл сайын шукталтын.
Пытартыш жапыште Валерий Григорьев драматург семын ойыртемалтеш.
Марий самырык театрыште режиссёр Зинаида Долгова «Ава шӱм» (2009 ий) икымше пьесыж почеш тыгаяк лӱман спектакльым сценыш луктын. Тиддеч вара «Ачай, ачием!..» (2016 ий), «Кок ватылан ик марий» (2020 ий) пьесыже-влак почеш шындыме спектакльлашкат калык куанен коштеш.
Коллегыже да йолташыже-влакын аклыме мутышт
Александр ПЕТРОВ, драматург:
– Валерий Помбеевич дене кумло ий наре палыме улам. Тунам тудо Марий самырык театрыште артистлан пашам ышта ыле, а мый – тӱҥалше драматург. Икымше ужмаштак тудын дене чак кылым кучаш тӱҥалынна. Поро кумылан да тыматле, кӱлеш годым полыш кидым шуялташ эреак ямде. Сай йолташ, шке пашажым шот дене шуктен шогышо айдеме.
Марий тӱвыра рӱдерым вуйлаташ тӱҥалмыж дене шкенжым поснак сай могырым ончыктыш, тунам шке йырже самырыкшымат, кугу опытан-влакымат чумырыш. Лач тунамак кызытсе Кугыжаныш Погын депутат Наталья Пушкина рӱдер дене пеҥгыде кылым кучаш тӱҥале, пеленже чолга студент-влакым кондыш. Тыге Марий КВН-ым, тӱрлӧ шоум, мыскара концерт-влакым эртараш тӱҥальыч. Уста вуйлатышын темлымыж почеш марий кас, марий дискотеке, марий ёлко калыкын вучымо пайремышкышт савырнышт, кеч-кушкыжат калык лыҥак погынен. Валерий Помбеевичын шке йырже чолга да чон йӱлен пашам ыштыше еҥ-влакым чумырен моштымыжлан кӧра Марий тӱвыра рӱдерын чапше калыкыште писын шарлаш тӱҥале.
Олег ИРКАБАЕВ, театрын художественный вуйлатышыже, Россий искусствын сулло деятельже:
– Валерий Помбеевич икымше пашаже «Ава шӱм» спектакль гычак илышым келгын ужшо семын шкенжым ончыктен. Произведенийым возаш актёр, режиссёр улмыжо сайынак полшен. Еш кокласе кылым чоным тургыжландарышын почын, ончышо-влак вургыж эскереныт. Тиде пашаж гоч тудо моштен возышо, илышым келгын почын пуышо драматург семын палемдалт кодын. Варажымат пьесылаштыже кӱлешан да жап дене келшен толшо темым тарватен моштымыж дене кумылым савыра. Тидыже спектакльлам ончаш толшо-влакын аклыме мутышт гоч раш почылтеш. Валерий Помбеевич – ятыр произведенийын авторжо, «Эн сай пьесе» конкурсышкат эреак кумылын ушна да сеҥыше радамыш лектеш. Мутлан, ӱмаште «Йӧратымаш да жап» пьесыж дене кумшо верым налын. Тудын почеш спектакльым театрын вес тургымыштыжо сценыш лукташ палемденна. Шонен пыштыме пашажым мучаш марте шуктышо, эреак уым кычалше драматург. А тидыже усталык шӱлышан еҥын ик эн сай качествыжлан шотлалтеш, садлан тудын деч эреак у произведенийым вучена.
Алевтина БАЙКОВА
Фотом еш альбомжо гыч налме
