18-19 майыште Калык куштымашым куштышо да хореограф-постановщик-влакын республикысе конкурсышт эртен.
Кок кечыште Я.Эшпай лӱмеш Марий кугыжаныш филармонийын сценыштыже йоча да самырык-влакын 46 усталык коллективышт (чылаже 850 утла еҥ) мастарлыкым ончыктен.
Конкурсын йодмашыже почеш, кажне коллектив кок номерым аклаш луктын: марий куштымашым да Российыште илыше вес калыкын куштымашыжым.
Конкурс Чумыр марий куштымаш II форумым иктешлыше мероприятийыш савырнен. Калык йӱлам аралыме да тукым гыч тукымыш шуен толмо – «Еш» национальный проектын ик эн тӱҥ задачыже. Тиде конкурс кушкын толшо тукымын калык куштымашлан шӱмаҥмыже да тудын йодмашан улмыжым эше ик гана пеҥгыдемден.
Гран-при дене 14-17 ияш-влак коклаште «Куштышо» номинацийыште М.С.Степанов лӱмеш Морко районысо тӱвыра да каныме рӱдер пеленысе калык лӱмым сулышо «Рвезылык» куштышо ансамбль (вуйлатышыже – Александр Якушев) палемдалтын. Сертификатын кугытшо – 200 тӱжем теҥге.
I степенян лауреат (10-13 ий) – «Самоцветы» куштышо ансамбль (Йошкар-Оласе 6-шо №-ан йоча сымыктыш школ. Премий – 150 тӱжем теҥге;
II степенян лауреат (14-17 ий) – «Ромашки» образцовый ансамбль (Волжск оласе тӱвыра рӱдер). Премий – 120 тӱжем теҥге.
III степенян лауреат (14-17 ий) – «Ералаш» йоча куштышо коллектив (Звенигово йоча сымыктыш школ). Премий – 100 тӱжем теҥге.
Спецприз-влак:
– Хореограф Ксения Ивановалан («Топотушки» ансамбль, Кужэҥер йоча сымыктыш школ), премий – 30 тӱжем теҥге;
– «Марий Эл» кугыжаныш куштышо ансамбль деч – «Онар» ансамбльлан;
– Республикысе Калык усталык да тӱвыра ден каныме паша шотышто шанче-методике рӱдер деч – «Каприз» ансамбльлан (Сеҥымашын ХХХ идалыкше лӱмеш тӱвыра полат);
– тӱвыра, савыктыш да калык-влакын пашашт шотышто министр деч эн сай марий куштымашым («Ӱдыр кумыл») ончыктымылан – «Настроение» коллективлан (Морко йоча сымыктыш школ);
Икымше-влакын толкынышт деч – «Арт-Гранд» студий (Звенигово район).
Сеҥыше-влакым шокшын саламлена. Те марий куштымашын ончыкылыкшо улыда.
– Эн сай радамыш лекше коллектив-влак Йошкар-Олаште Российын кечыжым палемдыме мероприятийыште мастарлыкым ончыкташ тӱҥалыт. Тиде республикыштына илыше-влаклан эн сай пӧлек лиеш, – лауреат-влакым саламлымыж годым палемден Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов.
Александр Якушев, «Рвезылык» куштышо ансамбльым вуйлатыше:
– Конкурсыш эрвел марий куштымашым да «Еш» кавказ сюитым аклаш луктынна. Ончылгочак ямдылалташ тӱҥалынна, вет костюмым ургыкташак шуко жап кая. Кавказ вел куштымашым шкеак шынденам, но Дагестан, Моско хореограф-влак деч видео урокым налынна. Дагестан гыч эсогыл ик хореограф лӱмынак толын. Шкеат Кавказыш ныл кечылан миен коштынам, тусо калыкын тӱвыраже, йӱлаж дене лишкырак палыме лийынам, вургем ойыртемыштым ужынам. Икманаш, чылажымат шке шижаш тыршенам, нуным ончен, йоча-шамычым чын виктараш тыршенам. Тиде сеҥымаш – пӱтынь коллективын сеҥымашыже, пӱжвӱдым луктын тыршымыже. Кажне движенийлан, вургемлан моткоч кугу тӱткышым ойыренна. Рвезе-влаклан папахым (коваште гыч ургымо упш), ичигим (йолчием), ӱштым да эше моло арверым лӱмынак Дагестан гыч налын кондымо. А ӱдыр-влаклан вургемым Йошкар-Ола гыч Валеа Лайегпур, тудо «Ассалам» кавказ куштышо ансамбльым вуйлата, чыла шотым эскерен ямдылен.
Тиде премий – ансамбльын 55 ияш лӱмгечыжлан чапле пӧлек.
Алевтина БАЙКОВА
Павел Стариковын фотожо
