КУЛЬТУР ДА ИСКУССТВО СЫМЫКТЫШ

«Марий Элыште» пӱрымаш корнышт иктыш ушнен

Лаштыкнан тачысе унаже – «Марий Эл» кугыжаныш куштышо ансамбльын артистше-влак, вате-марий Светлана ден Виталий КУДРЯВЦЕВМЫТ.

Светлана Звенигово районысо Кужмара селаште шочын-кушкын, а Виталий – Медведево район Шеклянур ялыште.

Иктыже 2005 ий годсек ты коллективыште кушта гын, весыже 2008 ийыште тушко ушнен.

Ансамльыш нуно кузе логалыныт? Вате-марийлан ик вере пашам ышташ келша мо? Нине да моло нерген шкешт дене мутланышна.

Светлана, тиде коллективыш толмо корнет могайрак?

– Изинекак кушташ йӧратенам, сандене кеч-могай пайрем годым ма концертыште эреак кушташ шогалтат ыле. А кугурак класслаште тунемме годым географий предмет да тудым туныктышо Наталья Михайловна Клешнинан йоча-влак дене пашам ыштымыже, урокым эртарымыже моткоч келшен. Мыят тудын гай туныктышо лияш шоненам. Но индешымше класс деч вара йоча годсо шонымашкем шуаш тӧчен онченам да нимогай нелылык деч посна Палантай лӱмеш тӱвыра да сымыктыш колледжыш тунемаш пурен кертынам.

Тугеже колледжыш пурен от керт гын, географий туныктышылан кает ыле.

– Туге докан, но калыкыште манмыла, мо ышталтеш — чылажат сайлан гына. Колледжыште тунемме годымак «Марий Эл» ансамбльыште кушташ тӱҥалынам. Тыштак шуко йолташым муынам, профессионал искусствышто тыршыше кумдан чапланыше еҥ-влак дене палыме лийынам. А эн тӱҥжӧ – лач тыште пӱрымашем вашлийынам.

Виталий, коллективыште ӱдыр-влак моткоч шукын лийыныт, а Светланан койыш-шоктышыштыжо тылат мо эн чот келшен?

– Поро кумылжо, ныжыл шинчаончылтышыже, шыман мутланымыже, шыргыжалмыже… Светам икымше гана 2008 ийыште ансамбльыште ужынам, а келшашыже кум ий гыч веле тӱҥалынна. Тиддеч вара эше кум ий эртымеке, марлан нальым.

Вате-марийлан ик вере пашам ышташ куштылго мо?

Светлана: – Тыште нимогай нелылыкым огына уж. Тыге икте-весын кушто улмыжым, мом ыштымыжым чыла ужаш лиеш. Адакшым гастроль годымат пырля улына. Икманаш, тынар ий жапыште пырля пашам ышташ, пырля канаш, куан ден ойгым лош пайлаш, икте-весым умылаш тунемын шуынна.

Гастроль дене могай кундемлаште лийында? Куштыжо эн чот келшен?

– Испаний, Франций, Бельгий, тыгак Моско ола… Кажне элыште, олаште лийме могай-гынат шарнымашым коден. Мутлан, Испанийыште воктекына рвезе толын шогалын да кушеч улмынам йодын. Марий Эл, Йошкар-ӧла гыч манын каласымеке, моткоч куанен да ятыр жап пеленна лийын. Тудат Йошкар-Ола гыч улмаш, пырля палымына-влакымат рашемденна.

Иктаж куштымаште мужыр дене улыда мо?

– Ончыч «Вич мужыр» куштымаште пырля лийынна. А кызыт мужыр дене пешыжак огына логал ала-мо… Такшым тӱҥалтыште икте дене куштена гын, мучашлан — весе дене. Адакшым сентябрь марте йоча дене мӧҥгыштӧ шинченам, сандене кызыт эркын-эркын тӱрлӧ куштымашыш пурем.

Виталий, а тыйын ансамбльыш толмо корнет кушеч тӱҥалын?

— Визымше классыште Национальный президент школыш вонченам. Туддеч вара Палантай лӱмеш тӱвыра да сымыктыш колледжыште тунемынам. Эше студент годымак «Марий Эл» ансамбльыш ушненам. Тунамак икымше гана гастрольыш лектынам. Мылам, латкандаш ияш рвезылан, йот эллашке миен коштмо кужу жаплан шарнаш кодын. 2010 ийыште колледжым тунем лекмеке, Озаҥысе культур институтыш пуренам ыле, но икымше курсыштак йокрокын чучын да тушеч кораҥынам, армийыш каенам. Салтак илыш деч вара уэш тиде ансамбльышкак чонем шупшын.

Ятыр трюк дене калыкым ӧрыктарет. Тидлан кушто тунемынат?

— Тидлан колледжыште тунемме годым кумылаҥынам да кызытат тудым ыштылам. Капкылым шуараш манын, лӱмынак спортзалыш ом кошт, пашаштат пӱжалташ сита. Мыйым ончен, эргым-влакат тӱрлӧ семын тӧрштылыт, кадыргылыт.

Кастене паша але концерт деч вара ноен толмекыда, кӧ кочкаш шолта?

— Южгунам черет почеш… Шукыж годым кухньышто мый шогылтам, а Виталий икшыве-влак дене жапым эртара.

Светлана, артист сомыл деч посна тый эше туныктышо улат. Тидлан жапым кузе муат?

— Паша деч вара пелашем йочасадыш икшывына-влакым налаш кая, а мый «Звукоград» студийыш коштшо-влакым кушташ туныктем. Нунын дене вашлиймеке, нойымет але иктаж нелылыкет улмо нерген чыла мондет, вет нунын шинчаштышт куаным ужмеке, кумылет кӱза да пашам ышташ вий лектеш. Кеч-могай паша деч сайжым налын моштыман.

Адакшым тиде ешыш ешартыш шийвундым кондаш полша?

— Туге, но мыйын пашамже тунарак неле огыл. Мый телым утларакше ыштем, а Виталий – кеҥежым, шошым. Тудо чоҥымо пашаш ушна, кермычым опташ мастар, коҥгамат оптен мошта.

Виталий, коҥгам опташ кӧ деч тунемынат?

— Ачам тракторист лийын, сандене, кугу лиймекем, трактор дене кудалышташ тӱҥалам манын шоненам. Кудалыштынже моштем, но… Тыгак изиэм годым ачамын коҥгам оптымыжым эскераш йӧратенам да тидлан тунемын шуынам.

Илен-толын тугеже шке пӧртымат чоҥен кертыда?

— Шонымаш уло, уке гын кок йоча дене тӱшкагудо пӧлемыште илаш куштылгыжак огыл. А ипотеке йӧн дене пачерым налаш – манаш веле…

Тендам ончен, эргыда-влакат кушташ йӧратат, очыни?

— Чын, мӧҥгыштӧ иктаж видеом чӱктет ма уке – Глеб ден Артём тунамак тавалташ лектын шогалыт. Артём ачаж семын трюкымат ыштылеш.

Алевтина БАЙКОВА мутланен

Фотом еш альбомышт гыч налме

Опубликовать в Одноклассники

Добавить комментарий