23 августышто Марий Элым вуйлатышын пашажым жаплан шуктышо Юрий Зайцев республикысе образований пашаеҥ-влакын республик кӱкшытан Августысо форумыштышт лийын.
Йӱлаш пурышо мероприятий ты гана Медведевысе 4-ше №-ан кыдалаш школышто эртен да самырык тукымлан шинчымашым пуымо пашаште тыршыше шӱдӧ наре еҥым иктеш чумырен. Тиде волгыдо, кызытсе жаплан келшыше 825 веран у тунемме тӧнежым, «Образований» национальный проект почеш, 2021 ий мучаште чоҥымо, а тений 1 сентябрьыште тудо шке омсажым почеш. Пашаче еш у тунемме идалыклан ямде, чылаже кумло классым чумырымо. Каласыман, тиде у школым почмылан кӧра Медведево посёлкышто илыше да тымарте кокымшо сменыш коштшо йоча 454 ӱдыр-рвезылан шагалемеш.
Мероприятийым торжественно почмо деч ончыч Марий Элым вуйлатышын пашажым жаплан шуктышо Юрий Зайцевлан школын спортзалжым, класслажым ончыктеныт. Тунемме верым вуйлатыше Лариса Дышкант школысо «ушан» кӱваран рекреаций кумдык, естественный да инженер наукыла дене лабораторийла, роботехнике да технологий дене кабинетла мультимедийный книгагудо да моло денат палдарен. Юрий Зайцев тунемме верым технический могырым кӱкшын аклен. Республикыште «Образований» национальный проект умбакыже илышыш пурталташ тӱҥалеш. У тунемме ий вашеш куд школым капитально олмыктымо, тиде пашалан 380 утла миллионым кучылтмо. Вес ийын тыгаяк программыш 13 школым пуртымо. Шушаш ныл ийыште кажне кокымшо школ уэмдалтшаш. Ешартыш образований системыште кызытсе инфраструктурым ыштыме пашамат умбакыже шуена», – каласен тудо. Ешартыш образованийын ик эн тӱҥ направленийлаж семын технический усталыкым, туризмым да краеведений пашам вияҥдаш кӱлмым палемден.
«Образований да науко министерствылан самырык туныктышо-влак дене вашлиймашым эртараш кӱштенам. Нунын дене республикыште образований системым вияҥдыме шотышто каҥашынем, шонымашыштым да пӱсӧ йодышыштым палынем. Самырык туныктышо-влаклан полшышаш улына, тек нуно умбакыже школыштак пашам ыштат», – ешарен Юрий Зайцев. Тыгк тудо палемден: образований сферын ончылно шогышо шуко задаче кокла гыч ик эн тӱҥжӧ – самырык тукымым патриотизм шӱлышеш кушташ. Мучашлан тудо туныктымо пашаште тыршыше-влаклан тунемме ийыште сеҥымашым тыланен да республикнан шым уста педагогшым «Марий Эл Республикысе образованийым сулло пашаеҥже» чап лӱм дене палемден.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
Д.Речкинын фотожо
