Коронавирус инфекцийын пандемийжылан кöра Марий Элыште утларак ямде улмо режимым 31 май йотке шуйымо.
«У коронавирус инфекцийын (COVID-19) шарлымыжлан кöра Марий Эл Республик кумдыкышто калыкан сай санитарно-эпидемиологический йöным ыштыме шотышто мере-влак нерген» указын у редакцийышкыже регионым вуйлатыше Александр Евстифеев кидпалыжым 30 мартыште пыштен.
«31 май – тунемме ий мучаш. Тиде пагытлан ме оперштабын заседанийжым угыч эртарена да инфекций дене кучедалмаште мом ыштен кертмынам аклена», – Марий Элыште у коронавирус инфекцийым кондымым да шаркалымым чактарыме шотышто оперативный штабын заседанийыштыже палемден А.Евстифеев.
Указын черетан редакцийже дене келшышын, Марий Элыште публичный, зрелищный, кандарыме, веселаҥдыме, ончыктымо, сотемдарыме, рекламе шотан да граждан-шамыч дене пырля тÿшка мероприятийым эртараш чаралтеш. Тиде чарак Кугу Отечественный сарыште сеҥымылан 77 ий темме лÿмеш торжественный мероприятий ден парадлан ямдылалтме, тыгак нуным эртарен колтымо дене кылдалтын огыл. Калык тыгак зданий ден сооруженийлаште, тÿшка транспортышто, кÿртньыгорно транспорт инфраструктурын объектлаштыже, таксиште маскым чийышаш.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
