УВЕР ЙОГЫН

20-26 июльлан гороскоп

Шорык

Тиде арня ласка огеш лий. Те пашаштат, мӧҥгыштат мом палемдымыдам ыштен шукташ огыда тӱҥал. Арнян кокымшо пелыштыже куштылгынрак шӱлалтеда. Тӱрлӧ шӧрыныштӧ талантдам ончыкташ йӧн лиеш. Чон йодмо сомылдалан жапым муашак тыршыза.

Презе

Арня тӱҥалтыште машинам виктараш шинчаш огеш темлалт, молан манаш гын иктаж-кушко каяш тарванымыда годым тудо корнышто пудырген кертеш. Тыланда ала-могай торжественный мероприятийым эртараш але уна-шамычым вашлияш логалеш.

Йыгыр

Окса шотышто нелылыкым шижыда. Тидыже ешартыш роскотыш пураш логалмылан кӧра лийын кертеш. Кугу сатум налаш огеш темлалт. Кумдан чапланыше але «кугу» еҥ дене палыме лияш йӧн лектеш. Иктаж-кушко миен толаш келшыше жап.

Рак

Арня тӱҥалтыште пашам пырля ыштышыда-влаклан але пелашдалан шылталыме шомакым ойлаш ида вашке. Тидлан амал кугу гынат, шкендам кидыште кучаш тыршыза. Каныш кечыла вашеш вий ешаралтмым шижыда да паша нойыктарымым чарна.

Лев

Тыланда тиде арнян нимогай шымлымашым шолып эртараш огеш темлалт. Каныш кечыла вашеш кумылда нӧлталтше лиеш. У пашам, у проектым тӱҥал кертыда. Йырда шкендан гаяк еҥ-влакым чумыреда гын, сомылда сайын ворана, шонымашда шукталтеш.

Ӱдыр

Арня тӱҥалтыште жапым арам эртараш огеш темлалт. Йӧратыме еҥда йолташда-шамыч дене ваш огеш лий гын, сайрак. Уке гын коклаштышт умылыдымаш лектын кертеш. Арнян кокымшо пелыштыже шӱмбелда дене ала-мом уым ыштышаш нерген мутланен келшеда.

Виса

Арня тӱҥалтыште паша да еш дене кылдалтше тургыжландарыше йодыш-влак лектын кертыт. Чылажымат иканаште рашемдаш ида пиж, почела-почела ыштыза. Тиде арнян тыланда премийым пуат але лотерей дене иктаж-мом модын налыда.

Скорпион

Кужу корныш тарваныман огыл. Йот элыш каяш лекме годым документ дене тӱткӧ лийман, уке гын йомдарен кертыда. Арнян кокымшо пелыштыже

вучымо кугурак должностьышкыда куснаш темлен кертыт. Шуко куандарыше, мутым колаш ямде лийза.

Пикшызе

Иктаж-кӧлан але иктаж-молан тӱлаш оксам электрон йӧн дене колтымо годым шекланыман – шийвундыда деч посна кодмо лӱдыкшӧ уло. Арнян кокымшо пелыже тунемаш да иктаж-кушко миен толаш келшыше лиеш. Лишыл еҥда-влак дене кыл саемеш.

Ирказа

Арня тӱҥалтыште пелашда дене умылыдымаш лектын кертеш. Амалже тиде але тудо йодышым рашемдыме годым кӧн ойжо чынрак улмо дене кылдалтеш, очыни. Мӧҥгыштӧ да пакчаште нимогай пашамат ешда дене тӱшкан ида тӱҥал – сырымашке веле шуыда.

Вӱд йоктарыше

Тыланда шӱдыр-влак тазалыклан, утларакше мом кочмылан кугурак тӱткышым ойыраш темлат. Уке гын аярген кертыда. Пелашда тендан дене молгунамсе деч ныжылге лиеш, чотрак азапланаш тӱҥалеш. Сӱаныш але юбилейыш ӱжын кертыт. Деловой кылда кумдаҥеш да пеҥгыдемеш.

Кол

Йӧратыме еҥда-влаклан тӱткышым утларак ойырыза, нунын дене чытышырак лийза. Поснак – икшывыда дене. Тудым мут дене огыл, шке примерда дене туныкташ тыршыза. Арня мучаште кеч-могай пашалан пижыда гынат, нойымым йӧршынат огыда шиж.

Л.КАМЕЛЕТДИНОВА

Опубликовать в Одноклассники

Добавить комментарий