Сайлымаш койын лишемеш. Тудын эртаралташ тӱҥалмешкыже кок тылзе веле кодеш. Кызытсе жапыште ик мандатан округла да партийный спискыла дене кандидат-влакым темлыме паша кая.
Куд партий кандидат-влакым ойырен налын. Нунын кокла гыч нылытынже избиркомыш документымат пуэныт.
Республикысе Сайлымаш комиссийын палдарымыж почеш, политический партий-влак тыгай радам дене депутат-влакым темленыт: Марий Эл Республикыште «Российская партия пенсионеров за социальную справедливость» политический партийын региональный отделенийже, КПРФ политический партийын Марий республиканский отделенийже, Марий Эл Республикыште «Новые люди» политический партийын региональный отделенийже, ЛДПР политический партийын Марий региональный отделенийже, «Единый Россий» Всероссийский политический партийын Марий региональный отделенийже, Марий Эл Республикыште «Справедливая Россия — Патриоты — За правду» Социалистический политический партийын региональный отделенийже.
СРЗП Социалистический политический партийын региональный отделенийже кандидат-влакым темлыме шотышто конференцийым эн пытартыш эртарен.
Документ-влакым але марте «Единый Россий» Всероссийский политический партийын Марий региональный отделенийже, ЛДПР политический партийын Марий региональный отделенийже, Марий Эл Республикыште «Новые люди» политический партийын региональный отделенийже, Марий Эл Республикыште «Российская партия пенсионеров за социальную справедливость» политический партийын региональный отделенийже сдатленыт.
Шушаш сайлымаш нерген Российысе Ӱдырамаш-влак ушемын Марий региональный отделенийжын председательже Нина Иванова тыге палемден:
– Мый регионышто еҥ-влакын социальный чолгалыкыштым, поснак яллаште, вияҥдышаш верч тыршем. Нужналык дене кредалмаш – тӱҥ задаче. «Мастер коммуникаций» квалификацийым нӧлтымӧ курсым эртымеке, чыла кӱкшытыштат проектный да стратегический виктарымаш теме дене пашам ыштем.
Кызыт сайлымашке темлыме участник-влакын спискышт ышталтеш. Тиде моткочак кӱлешан жап. Кандидат-влак коклаште кугу конкуренций лиеш, очыни, молан манаш гын сайлымаште сеҥышашлан кажныже шке программыж дене палдара, йӧнжым кучылтеш.
Мыланна, общественник-шамычлан, тыгак моткочак ответственный жап – регионым вияҥдыме корным, тудын ончыкылыкшым, республикыштына илыше-влакын интересыштым законодательный кӱкшытыштӧ ончыктен да кӱлешан решений-влакым приниматлымашке шке надыржым пыштен кертше-влакым ойырен налме – жап шуэш.
Евгений Кузнецов, Марий Элыште Мер эскерымаш штаб вуйлатыше, «Марий Эл» увер агентстве директор, Марий Элыште сайлымаш эртымым Мер эскерымаш штаб вуйлатыше, Россий журналист-влак ушемын еҥже:
– Марий Элын избирательный комиссийыштыже документ-влакым налме паша мучашлалтеш. Республикын Кугыжаныш Погынжо ик мандатан округла гыч депутат-влак, тыгак партийный списке-влак почеш чумыралтеш. Тиддеч ончыч партий-влак конференцийым эртарат, кандидат-влакым темлат. Таче регионын парламентыштыже ныл партийын фракцийже-влак улыт – тиде «Единый Россий», КПРФ, СР да ЛДПР. Документ-влакым пуымым аклен ончалаш гын, марий парламентын у составышкыже «Новые люди» ден «Российская партия пенсионеров за социальную справедливость» политический партий пурынешт. Политический конкуренций – сай паша. Но тугай шонымаш шочеш, пуйто сайлымаш процессын участникше-влак кокла гыч южышт избиратель-влак нерген кызыт веле шарналтеныт, а южышт ты шотышто нимогай пашамат огыт ыште. Ты шотышто «Единый Россий» партийын фракцийжын парламентыште, тыгак региональный отделенийынат пашашт ойыртемын ончалтеш. Конкурент-шамыч избирательыштлан чынже денак ыштыме, кӱлешан пашаштым, а билборд-влакым веле огыл, ончыктен шуктат мо, ончалына …
Л.Камалетдинова
Фотом соцкыл лаштыкла гыч налме
