«Образований» национальный проект дене келшышын республикысе икмыняр школым капитально олмыктат, а икмынярыште спортзалым уэмдат. Нунын коклаште – У Торъял школ-интернат, тыгак Юрино районысо Козиково школ.
Икымшыштыже кызытлан леведышым, пырдыжым, тыгак шокшым, вӱдым пуымо системылам да канализацийым уэмдыме. Школысо пӧлемлаште отделкым тичмашнек ыштыме. Электромонтаж, вентиляций системым вашталтыме паша-влакат мучашлалтыт.
Актовый заллан ныл секциян кресле-шамычым, акустике системым, проекторым, экраным налме. Чыла кабинетлаш у партым, ӱстелым, шкафым вераҥдаш тӱҥалыт. Технологий дене шинчымашым пуаш чыла оборудованийым налме, англичан йылме дене кабинет ден тӱҥалтыш класс-влаклан кок интерактивный панель уло, марий йылме ден историй кабинетлаште кок жидкокристаллический панель лиеш, а музык кабинетыште – музыкальный оборудований.
Тунемме верын йоча-влакым вашлияш ямде улмо шотышто актыш кидпалым тений 15 август марте пыштышаш улыт.
Юрино районысо Козиково школышто нацпроектын «Кажне йочан сеҥымашыже» федеральный проектше почеш, спортивный залым уэмдыме. Тушто окна блокым, омсам, электричествым, сантехнике приборым вашталтыме, кӧргӧ отделкым ыштыме да у инвентарьым налме.
Г.Кожевникова
Фотом Марий Эл Образований да науко министерствын сайтше гыч налме
