Шукерте огыл Марий Элын калык поэтше, прозаик, журналист, Россий Писатель ушемын еҥже Геннадий Сабанцевын творчествыжлан пӧлеклалтше эше ик сылне книга ош тӱням ужын, «Родники родной земли» маналтеш.
Тушко авторын марла возымыжым рушлаш кусарыме почеламут-влакым пуртымо. Геннадий Леонидовичын позийже дене палыше-влакым тудын кажне ойсавыртышыже шонкалаш тарата манаш гын, чын лиеш, очыни. Таклан огыл лач тудын творчествыжлан шке у савыктышыжым Россий журналист ушемын еҥже, Югра кундемыште шочын-кушшо да кызытат туштак илыше руш мут мастар Павел Черкашин пӧлеклен. Поэзий прозо кусарыме произведениян 84 книган авторжо. Нуно Россйыште веле огыл, Латвийыште, Францийыште, США ден Канадыште савыкталтыныт. У книга Новокузнецкыште лектын.
У савыктышым кидыш налмекыже, Геннадий Леонидович дене вигак мутым вашлалташ йӧн лектын. Павел Черкашин шкежак палыме-влак гоч марий поэтлан почеламутшо-влакым кусараш темлен. Геннадий Сабанцевын ойлымыж почеш, национальный поэт-влак кусарышашлык почеламутыштын кажне шомакшым ончылгоч кусарен пуат. А вара автор тудын негызеш, сылнымутын нормыж дене келшышын, чон шижме, авторын шонымашыжым умылымым шотыш налын келыштара. Геннадий Сабанцевын почеламутшо-влак тылеч ончыч тыва, мордва (эрзя ден мокша), финн, венгр, эстон, коми, одо, татар йылмыла дене савыкталтыныт. Кеч шкеже ик йылмыжымат ом пале манын шыргыжале, но татар йылмым тунемаш кумылжо уло. «Мый шуко возышо автор омыл, но сайын возаш тыршем», — каласыш тудо. Тачысе кечылан Г. Сабанцевын шым книгаже ош тӱням ужын: кокытшо – рушла, визытше – марла.
Изиж годсек сылнымутлан шӱман рвезе икымше почеламутшым кудымшо классыште возен. Марий йылме ден литературым туныктышо мӧҥгысӧ пашалан тӱрло теме дене сочиненийым монь возаш заданийым пуэден. Геннадийлан тиде келшен. Икымше почеламутшат тыгак шочын. Тудо «Март» маналтын. 50 ий ынде шуэш гынат, тудо саде корнылам йӱкын лудын пуыш:
«Поран тылзе мемнан дечын кайыш,
Мардежат урмыж коштымым чарнен.
Лач коклан гына тыш, мемнан велыш,
Пуалеш тошто годсым шарнен…»
А вара 1973 ий 17 мартыште «Ямде лий» газетыште тудо савыкталтын. Редактор Валентин Исинековын куштылго кидше дене Геннадий Сабанцев поэзийын кумда корнышкыжо лектын.
Илен-толын, йӧратыме поэтна шкежат творчествыжым чумырышо рушла книгам лукташ шона. Кызыт тидын шотыштак тырша. Чукоткышто газет редакцийыште ыштымыж годым тугакшат рушлаже возаш логалын. Вара возымыжым шкак марлашкат кусарен. Туге гынат поэт шкенжым марла возышылан шотла. Возышылан веле огыл, марла шонышылан. Теве шукерте огыл Аркадий Букетовын произведенийжым рушлаш кусарыме опытшо лийын. А руш йылме гыч марлаш кусарыме пашаже тудын ситышын. Тыгак тудын почеламутшым могай йылмыш кусареныт, ты йылмыла гыч Геннадий Леонидович поэзийым рушлаш кусарен.
У книгаш марий поэтын коло почеламутшо пурен. П.Черкашинын кусарымыже тудлан келшен. «Павел мыйын кумылымак, шонымашымак шижын моштен», – палемдыш тудо. Чаманен каласыман, у книган тиражше изи.
С.Носова
