Таче, 26 февральыште, Йошкар-Олаште Марий Эл Кугыжаныш Погынын 14-ше сессийже эртен.
Заседанийыште 19 йодышым ончымо, нунын кокла гыч кумытшым Марий Элым вуйлатыше Юрий Зайцев пуртен, индешыжым – республикын правительствыже.
Депутат-влак регионым вуйлатышын администрацийжым вуйлатыше Лидия Батюкован кандидатуржым Марий Эл Республик правительстве председательын алмаштышыжын должностьышкыжо пеҥгыдемденыт, тыгак республикын икмыняр законышкыжо вашталтыш-шамычым пуртеныт.
Тылеч посна республикысе кугыжаныш собственностьын погыж дене пайдаланыме радам, предпринимательстве да инвестиций сферыште муниципал акт-влакын проектыштым аклыме процедур дене кылдалтше закон-влакым федерал законодательствылан келыштареныт.
Кугыжаныш Погын «Марий Эл Республикын сулло амалкалчыже» у чаплӱмым пеҥгыдемдыме, Морко районышто Азъял почиҥгам Тыгыде Морко ял дене ушымо нерген пунчал-шамычым луктын. Тыгак спецоперацийын Российын Геройжо чаплӱм дене палемдалтше участникше але заслугылан орден дене наградитлалтше боевой действийын ветеранже-влак ден СВО-што вуйым пыштыше тыгаяк военнослужащий-шамычын ешыштлан яра палемдалтше мланде участке олмеш окса выплатым ыштыме нерген у законын проектшым ончен. Таче республикыштына 254 еҥ мланде участкым яра налаш черетыште шога. Ынде нунылан мланде олмеш 300 тӱжем теҥге кугытан окса выплатым налаш правам пуэныт.
Марий Элын элгӧргӧ паша министржын алмаштышыже Николай Хорошавин ден Кугыжаныш шотлышо палатыжын председательже Илья Акчурин профильный ведомство-влакын 2025 ийысе паша лектышышт дене палдареныт. Республикысе законодательный органын ӱмашысе пашаж нерген докладым Кугыжаныш Погынын председательже Михаил Васютин ыштен.
Сессийыште тыгак Марий Эл законодательствын 2025 ийысе состоянийже нерген докладым колыштмо, Кугыжаныш Погынын регламентышкыже, тӱвыра, национальный политике, туризм да спорт шотышто комитетшын составышкыже вашталтышлам пуртымо.
Маргарита ИВАНОВА.
Марий Эл Кугыжаныш Погынын фотожо.
