2022 ийын иктешлымашыже почеш «Лӱдыкшыдымӧ сай качестван корно» проектым илышыш пуртымаште кугу кӱкшытыш шумылан РФ вице-премьер Марат Хуснуллин Марий Эл вуйлатышылан дипломым кучыктен.
Тиде нацпроектым илышыш шыҥдарыме шотышто регион-лидер-влакын командыштым саламлымаш 28 апрельыште Казаньыште Россий Федерацийыште региональный вияҥмаш шотышто правительственный комиссийын президиумжын (штабшын) заседанийже жапыште эртен.
Ты нацпроектым илышыш пуртымо жапыште Марий Элыште корно сетьым шотыш кондымо шотышто республик ончылно шындыме задачым шуктымо веле огыл, а ончылтен ыштыме. 4 ий жапыште планым 199,7 километрлан утларак тӧрлатыме. Тений идалык тӱҥалтышлан корно сетьын кумшо ужашыжым – региональный значениян 894,7 км автомобиль корным – норматив йодмаш почеш келшышын шотыш кондымо.
Марий Эл вуйлатышын ойлымыж почеш, тыгай кугыт пашам палемдыме жапым ончылтен шукташ федеральный полыш деч посна огеш лий ыле. 2020 гыч 2022 ий марте гына федеральный бюджет гыч тидлан 3 млрд. теҥге ешарен ойыралтын.
2023 ийыште «Региональный да верысе корно сеть» регионысо проектлан 5,8 млрд. теҥге ойыралтшаш. Тиде окса дене региональный значениян 266,21 км корным, Йошкар-Ола кумдыкыш пурышо верысе значениян 19,51 км корным да 679 погонный метр наре кӱвар сооруженийым нормативный состоянийыш кондаш палемдалтеш.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
