Марий Эл вуйлатыше Юрий Зайцев «Единый Россий» партийын председательже Д.А.Медведевын региональный общественный приёмныйыштыже граждан-влаклан приёмым эртарен.
Йошкар-Олаште илыше Евгения Гуляевам Анциферов уремысе 27 номеран пӧртым кунам олмыкташ тӱҥалме нерген йодыш тургыжландара. Мэр Евгений Маслов умылтарен: пӧртым 2038-2040 ийлан олмыкташ палемдыме улмаш, но йодмаш почеш жапым вашталтыме. Ынде шуко пачашан ты пӧрт 2023-2025 ийлаште капитально олмыктымо паша планыш пурен. Кодшо ийын тыште инженер системым капитально тӧрлымӧ, шушаш ийыште леведышым да фасадым ачалат.
Кузнецово селаште илыше Анжела Соснина Садовая урем корнын шартышыже йӧрдымыш лектын, луман-йӱран шошым да шыжым кошташ моткоч йӧндымӧ манын вуйым шийын. Республикын транспорт да корно озанлык министрын алмаштышыже Елена Кузнецован мутшо почеш, Садовая ден Молодёжная уремлам тӧрлымӧ шотышто проект да смете документаций ямде. Республикын бюджетше гыч Медеведево районлан 22 млн. теҥге целевой субсидийым ойыраш палемдыме. Окса верысе корным, тыгак школла да моло тунемме тӧнежла дек наҥгайыше корным олмыкташ кучылталтшаш.
Марий Эл вуйлатыше, верышке лектын, ыштышаш пашам палемдаш, а шошым ты йодышым уэш тергаш кӱштен ойлен.
Йошкар-Ола – Советский автобус маршрутым Ургакш посёлко гоч колташ ок лий мо? Тушко корно сай, но автобус ок пуро. Тиде йодыш дене Людмила Коноплева толын. Республикын транспорт да корно озанлык министрын алмаштышыже йодышым рашемдаш да решатлаш сӧрен.
«Таче пуымо йодыш-влакым тергаш, мучаш марте шукташ да мо ышталтме нерген мыланем увертараш», – тыгай задачым шынден Юрий Зайцев.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
