Сеть
У вӱталан – у куат
«Рӱдӧ да Юл кундем Россеть» ПАО-н «Мариэнерго» филиалжын пашаеҥже-влак республикыште вольыкым ашныме кугу комплексын у корпусшым электросетьыш ушеныт.
Тидлан специалист-влак кок трансформаторан да 10/0,4 киловольт куатан подстанцийым чоҥеныт. Тушто кажне трансформаторжо 1250 киловольт-амперан. Тылеч посна 2,4 километр кутышан электролинийым утларак чытыше да изолироватлыме воштыр дене шупшыныт. «Семёновский» племзаводлан 1,1 мегаватт энергокуатым пуэныт.
Ты предприятий тӱкан шолдыра вольыкым ашна, шӧрым лӱшта да продукцийым ямдыла. Вольыкым пукшаш пырчан, отызан да ӱян культурым, пакчасаска ден вожсаскам куштат.
Кӱлешан энергетике инфраструктурым пашаш ушен, энергокуатым кугемдымаш производствым кугемдаш, ешартыш паша верым почаш да ыштен лукмо продукцийын ассортиментшым кумдаҥдаш полша.
Юрий ИСАКОВ.
Снимкыште: племзаводын у корпусыштыжо.
Фотом «Мариэнергон» пресс-службыж деч налме.




