Марий Элын Тазалыкаралтыш министерствыжын увертарымыж почеш, COVID-19 дене кылдалтше сÿретын палынак саеммыжлан кöра республикыштына инфекционный койко чотым иземдыме.
Таче регионысо куд медицине организацийыште у коронавирус инфекций дене черланыше пациент-влаклан полышым пуымо 190 койкым гына кодымо.
Йошкар-Оласе больнице ден Сар-влакын ветераныштын республиканский клинический госпитальышт тичмашнек ончычсо паша радамышкышт пöртылыныт.
Кызыт медик-шамыч пациент-влаклан плановый полышым пуат, диспансеризацийым эртарат, а у коронавирус инфекцийым чытен лекше-шамычын тазалыкыштым келгынрак шымлат. Тидымак шотыш налын, калыклан уто-сите лийме деч тиде йöн дене пайдаланашак кÿлеш.
Пандемий лушкыдемын гынат, шке тазалыкым аралыме мере-влак нерген мондаш огеш кÿл – эпидемий ваштареш виктаралтше мероприятий-шамычым нигö кораҥден огыл. Кидым шовын дене мушкаш але антисептик дене обработатлаш, шуко еҥ улман верлаште маскым чияш ида мондо.
Таче пандемийын ончыкыжым кузе вияҥын кертмыж нерген ойлаш неле. Моло элысе сÿретым иктешлен, иктым гына каласаш лиеш: у коронавирус инфекций шкеж нерген ушештаренак шога. Шанчызе-шамычын шонымышт почеш, тудын у толкынжо Российыш август-сентябрьыште толын шуын кертеш. Сандене вирус деч вакцинаций да ревакцинаций полшымо дене аралалташ лийме нерген шарненак шогыза.
М.ИВАНОВА
