Российыште пожарный охраным ыштымылан 30 апрельыште 374 ий темын.
Регион вуйлатыше Юрий Зайцев республикын подразделенийжын пашаеҥже ден ветеранже-влакым профессионал пайремышт дене саламлен да пожарный автоцистерне, автотошкалтыш-влак да моло специализированный автомобиль деч сравочым кучыктен.
– Жаплан келшыше технике пожар дене кучедалмаште да еҥ-влакын илышыштым арален кодымаште моткоч кӱлешан, – палемден Юрий Зайцев.
Марий Эл вуйлатыше Йошкар-Олаште, Воскресенский паркыште, «Пожарный ден утарыше-влаклан» памятник деке пеледышым пыштен, тематический площадкылаште лийын, технике выставкым ончен савырнен да Пожарный охране кечылан пӧлеклалтше торжественный мероприятийыште лийын. Пайремыште тудо пожарный-шамычын пашаштым кӱкшын аклен да ойыртемалтше пашаеҥ-влаклан наградым кучыктен.
Тиде кечын Йошкар-Олаште илыше да уна-влакым концерт программе дене куандареныт, кызытсе жапысе да ондакысе пожарно-спасательный технике автопробег лийын. Тыгак Патриарший площадь кумдыкышто Изи Какшаныште вӱд гыч айдемым утарыме шотышто показательный выступленийым ончыктеныт.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
