Таче Йошкар-Ола гыч Курск областьыш 10 тонн утла гуманитар грузым колтымо.
Тудым республикнан 13 районыштыжо илыше еҥ, предприятий ден организаций, кучем орган, добровольческий объединений, «Единый Россий» партийын верысе пӧлкажын, тыгак «Россий верч» калык фронт» общероссийский мер толкынын регионысо пӧлкажын йыжыҥъеҥже-шамыч чумыреныт.
Марий Элым вуйлатыше Юрий Зайцевын кӱштымыж почеш правительстве председательын икымше алмаштышыже Михаил Васютин гуманитар грузым оптен колтымо пашам эскерен. Курск областьыште илыше-влаклан вӱдым, кочкыш продуктым, гигиене ден озанлык арверым, канцеляр сатум, книгам, вургем ден йолчиемым, эмым колтымо.
Ушештарена, 8 августышто Марий Элым вуйлатышын тӱҥалтышыж почеш республикыштына ВСУ-н атакыжлан кӧра азапыш логалше-шамычлан гуманитар полышым погаш тӱҥалме.
Таче кечылан гуманитар грузым погымо кум пунктым почмо:
— Мер полыш штабыште (Йошкар-Ола, Пушкин урем, 14-ше пӧрт);
— В.И.Ленин лӱмеш тӱвыра полатыште (Йошкар-Ола, Машиностроитель урем, 22-шо А пӧрт);
— Россий Армийын тӱвыра полатыштыже (Йошкар-Ола, Сталинград кредалмашын геройжо-влак урем, 35-ше пӧрт).
Полыш дене кылдалтше чыла йодышым +7 (8362) 63-00-39 телефон дене рашемдаш лиеш.
Марий Элым вуйлатышын пресс-службыжын уверже негызеш Маргарита ИВАНОВА ямдылен
