М.Шкетан лӱмеш Марий кугыжаныш драме театрыште шушаш 106-шо тургым тений молгунамсе деч ондакрак, 5 сентябрьыште, почылтеш. Тудо «Микулан – презе, Якулан – ӱдыр» премьер дене тӱҥалеш. Тиде, театрын шындышаш спектакльже, паша планже да икмыняр моло нерген кушкыжмын эртыше пресс-конференцийыште театрын художественный вуйлатышыже Василий Пектеев, директоржо Эрик Юзыкайн, тӱҥ режиссёржо Роман Алексеев, театрын режиссёржо Алексей Ямаев каласкалышт, журналист ден блогер-влакын йодышыштлан вашештышт.
Ондакрак почылтеш
Василий Пектеев палемдыш:
– Тений театр сезоным моло ийласе семын октябрьыште огыл, а сентябрьыштак почаш мутланен келшенна. Тиде кечын Роман Алексеевын шындыме премьер комедийым ончыктена. Пашана калыкым куандара, да тудо кассовый лиеш манын ӱшанена.
Сентябрьыштак театр Чечняшке Грозный олашке Национальный театр-влакын «Федерация» всероссийский фестивальышкышт кая. Тушто 13 сентябрьыште «Торешвате» спектакльым ончыктат. А тылеч ончыч, 7 сентябрьыште, тудым Шкетан театрын сценыштыже модыт.
Ойлымыж почеш, тылеч вара сентябрьыштак Сергей Маковлан 70 ий темме лӱмеш фестивальым эртараш ямдылалтыт. Тушто чапланыше композиторын возымо семже дене сылнештарыме икмыняр спектакльым ончыктат.
Чехов, Колумб…
Шушаш сезонышто ончышо-влакым икмыняр у паша вуча. Степан Пектеев Антон Павлович Чеховын «Дядя Ваня» пьесыж почеш тыгаяк лӱман спектакльым (лӱмжым рушлак кодаш шонат) калык ончыко луктеш. Кызыт репетиций кая. Премьерже октябрьыште лийшаш. Мо оҥайже, але марте Шкетан театрыште тиде чапланыше писательын произведенийже почеш спектакльым ик ганат шынден огытыл, сандене ты пашам моткочак ужмо шуэш. Адакшым тиде режиссер у деч у йӧным кучылташ йӧрата. Сценыш эсогыл машинамат лукташ огеш ӧр. Тугеже тыштат ойыртемалтшыже ятырак лиеш, очыни.
– Степан Пектеевын тиде проектше Национальный театр-влакын ассоциацийыштын да тудын председательжын, Александринский театрын вуйлатышыже, режиссер Валерий Фокинын полшымыж дене илышыш пурталтеш, – палдарыш Василий Александрович.
– Степан Пектеевын проектше нерген поснак ойлыман. Тудын спектакльже-влак мемнан творческий пашаште ойыртемалтше улыт. Тиде постановкат республикын театр илышыштыже черетан событий лияш сӧра. Кызыт театрын чыла цехше тудым ямдылымаште тырша, – каласыш театрын директоржо Эрик Юзыкайн.
Роман Алексеев тыгак эше «Небесный тихоход» киносценарий почеш «Кавасе алаша» спектакльым шындаш ямдылалтеш. Тиде мурылан, куштымашлан поян комедий лиеш.
Василий Домрачев кызыт Зинаида Долгован «Ял пайрем» пьесыж почеш спектакль дене пашам ышта. Премьерже февральыште лийшаш.
– Кугу Отечественный сарыште сеҥымылан шушаш ийыште 80 ий темеш. Тиде дате деч ме ӧрдыжеш огына код: 9 Май вашеш режиссер Алексей Ямаев Виктор Розовын «Вечно живые» пьесыж почеш спектакльым лукташ ямдылалтеш. Тиде произведенийым шукынжо «Летят журавли» фильм гоч палат, – рашемдыш Василий Пектеев.
Алексей Ямаев эше вес ончыкылык кугу пашаж денат палдарыш. Ойлымыж почеш, тудо Алексей Житковскийын «Мизантроп» пьесыж почеш, жанрже дене тудо триллер, спектакльым шындаш палемда. Тушто улыжат кок актер модаш тӱҥалеш. Ме палена, мутлан, «Как спасти камер-юнкера Пушкина» спектакльымат тудак шынден, да тушто улыжат 1 еҥ модеш. Тугеже тиде пашажат ойыртемалтше лийшаш.
Тӱҥ режиссёр Роман Алексеев театрын ыштышаш пашаже, шкенжын ямдылыме спектакльже нерген кӱчыкын ойлыш. Рашеме: тушто муро ден куштымаш шагал огыл лийыт, сценыш мотоциклым луктыт. Оҥай…
Кушто вучеда – палдарыза
Тыгак Роман Алексеев шукерте огыл Морко район Марий Кужер ялыште кава йымалне «Кеҥеж йӱд» спектакльым кузе модмо нерген кумыл нӧлтын каласкалыш. Тыгай йӧн дене ончыкташ келшен толшо спектакль шагал огыл, но нуным ончыкыжым кушто модаш лиймым палаш гын, сай ыле, ойлыш. Да тидланже мемнан деч, газет пашаеҥ-влак деч, полышым йодын, театрын директоржо ден художественный вуйлатышыже тыге темлышт:
– Шкетан театр кава йымалне спектакльым республикна мучко тӱрлӧ кундемыште моднеже. Сандене газетыштыда йодыштмашым эртарыза – тек лудшо-влак возат: кеҥежым кушто, могай районышто, могай ялыште – нуным модаш лиеш? Тидлан темлыме илемыште келшен толшо вер, транспорт дене пураш сай корно, электричестве лийшаш. Верысе кучем полшаш кумылым ончыкта гын, моткоч сай.
Тугеже, лудшына-влак, йодыштмашыш чолган ушнеда манын ӱшанена. Шкетан театрын талантан артистше-влак ончыкыжым лачшымак тендан ялышкыда миен, чапле спектакльыштым ончыктат гын, очыни, шкежат куанеда! Сандене 8-902-671-14-57 сото телефон номерышкем йыҥгыртен, возен колтен, «Марий Эл» газетнан ВКонтакте лаштыкыштыже (https://vk.com/gazeta_mari_el)
йӱклен да комментарийыште темлымашдам серен кертыда. Айста поро пашам ыштена.
Сай йӧным шонен муыныт
Умбакыжат мутланымаш театрын пашаже да илышыж дене кылдалтше
пӱсӧ, кӱлешан йодыш-влакым каҥашымаш дене шуйныш. Да тыглай гына огыл, а чайым подыл шинчен. Тидыже поснак келшыш, вет марий сийгудышто кӱэшт кондымо когыльо, шӱрашан да пареҥган мелна моткочак тамле улыт ыле! Пеш сай йӧным шонен муыныт …
Любовь Камалетдинова
Авторын фотожо
