Эртыше кечылаште Кужэҥер районысо Старсела ялыште ветеран-влак коклаште ВЛКСМ-лан 100 ий темме лўмеш футбол дене турнирыште икмыняр район вийжым терген.
Футбол пасушто Советский, У Торъял, Кужэҥер, Шернур районла гыч команде-влак мастарлыкым ончыктеныт.
– Турнирыште ончычсо комсомолец-влак модыныт. Мероприятий почмаштат Комсомол рескомын икымше секретарьже Сергей Царегородцев лийын, – ойла таҥасымашын организаторжо С.Морозов. – Икымше верыш лекше «Звезда» (Советский) командылан моткоч чапле кубокым кучыктеныт. Кокымшо верыш «Сокол» (Шернур) лектын гын, кумшо верыш – «Немда» (У Торъял). Такшым футболлан эреак чонем йўла, мом ыштет, фанат улам. Теве тўнямбал чемпионатымат чон вургыжын ончем. Российын сборный командыж деч посна тыгак талын модшо Месси верч тургыжланем, мыланем тудын модмыжо келша. Бразилийын командыж верч чон йўла. Такшым эше чылажат ончылно, шонем.
Турнирыште модшо-шамыч коклаште «эн-энжым» палемденыт. Мутлан, эн сай капка орол – Николай Бусыгин («Немда», У Торъял), эн сай защитник – Вячеслав Мустаев («Сокол», Шернур), эн сай нападающий – Валерий Мамаев («Сокол», Шернур), турнирын эн сай модшыжо – Николай Сидоров («Звезда», Советский), эн сай бомбардир – Александр Таныгин («Звезда», Советский).
Е.Эшкинина.
