Йошкар-Оласе «Восточный» микрорайонышто чоҥымо у школ шушаш тунемме ийлан ямде лиеш мо?
Тиде кечылаште объектым тергаш Марий Эл Кугыжаныш депутат Максим Бронников, республикын образований да науко министрже Лариса Ревуцкая, Йошкар-Оласе образований виктем вуйлатышын пашажым жаплан шуктышо Владимир Никандров, мер контроль тӱшкан еҥже Андрей Сакович да рӱдола администрацийын пашаеҥже-влак миеныт. Нуным школ вуйлатыше Наталья Пушкина ден чоҥымо пашам шуктышо подрядный организацийым вуйлатыше вашлийыныт.
– У школым почмо татым изин-кугун вучена! Чоҥымо паша мучашлалтын, кызыт кабинетлаш мебельым да кӱлеш оборудованийым вераҥдат, а туныктышо-влак у тунемме ийлан ямдылалтыт. У школышто ик эн тӱҥлан республикнан паша рынкыштыже ик эн йодмашан инженер-технологий напрвлений шотлалташ тӱҥалеш, – каласен Лариса Ревуцкая.
Ушештарена, тиде тунемме вер Марий Элын 2013-2030 ийлан «Образованийым вияҥдымаш» кугыжаныш программыже кышкарыште чоҥалтын.
Г.Кожевникова
