Шукерте огыл Йошкар-Олаште марла репым йоҥгалтарышылан «Шып лий» лӱман клипым войзеныт.
Клипым войзымашке 200 наре еҥым ушеныт, тиде – войзышо тӱшка, оласе куштышо коллектив, лӱмлӧ артист, палыме еҥ, блогер да самырык-влак. Уфа, Моско олала гыч лӱмын толшо-шамычат лийыныт.
Интернет кумдыкышто альбомын презентацийжат эртен. Пытартыш кече марте мурым йоҥгалтарышын лӱмжым организатор-влак шылтеныт. Кеч клипым войзаш ямдылалтме пашаже кужун шуйнен. А тидлан актёр-влакымат, имньым, комбым, техникым, тӱшка сцене-влаклан участник-шамычымат кычалаш логалын. Лӱмлӧ актёр-влак кокла гыч тушко Юрий
Синьковский, Акпарс Иванов, Максим Брызгалов, Константин Пакшин ушненыт. Клипыште Йошкар-Олан мотор луклажымат, калыкшымат ончыкташ тыршыме. «Командылан полшышо чыла еҥлан кугу тау», – ойла клипын режиссёржо Денис Шаблий.
Тудын киностудийжак клип дене пашам ыштен. Режиссёрын палемдымыж почеш альбомышко марий йылме дене 10 композицийым пуртымо. Тудын вес шонымашыже – провинциальный олаште илыше творческий командын могай сеҥымашке шуын кертмыж нерген документальный фильмым ышташ.
«Денис Шаблийын кузе пашам ыштымыжым мый шке шинча дене ужынам. Мемнан шып оланам ылыжтен колташ манын шке чолга командыж дене толмыжлан куаныман гына. Нунын дене пырля пашам ыштыме деч мый кугу куаным налынам. Шке ончылно шындыме задачым нуно шукташак тыршат», – ойла Российын сулло артистше, Марий Элын калык артистше Юрий Синьковский.
«Йошкар-Ола» альбомым 10 февраль гыч Интернетын Яндекс Музыка, VK Музыка, Звук да моло площадкылаште колышташ йӧн уло. Мартыште марий рӱдолан ик клубыштыжо альбомын презентацийже эртышаш. Тидын нерген «Шаблий» киностудийын соцкыл лаштыкыштыже увертаралтеш.
С.Носова
Снимкыште: клипым войзышо тӱшка.
Фотом киностудийын соцкыл лаштыкше гыч налме.
