«Шочмо йылмым эн сайын туныктышо» Россий кӱкшытан конкурсын финалыштыже Марий Элын чапшым тений Советский посёлкысо 3-шо №-ан кыдалаш школышто марий йылмым да ИКН-ым туныктышо Роза Богомолова арален да Россий Федераций Просвещений министерствын Тауштымашыж дене палемдалтын.
Тудын дене эртыше конкурс шотышто республикын Образований да науко министерствыштыже эртыше пресс-конференцийыште мутым вашталташ йӧн лекте. «Мемнан туныктышо-влаклан тыгай кӱкшытан мастарлык таҥасымаште мо ок ситыла чучын?» йодышемлан Роза Александровна каласыш:
– Методический материал огеш сите. Конкурслан ямдылалтме годымат тидлан кӧра изишак йӧсылык лектеш. Но мый газет гоч школнан администрацийжылан кугу таум ойлем. Тудо тиде конкурслан мыйым ойырен, мылам ӱшанен да эреак полшен. Тыгайым шижын, ужын, шкан эшеат ӱшанет да чылажымат вес, у шинчаончалтыш дене ончет: самырык тукымым туныкташ эшеат кугу кумыл лектеш, паша опыт дене палдарыме шуэш. А тыгай конкурс – моткочак кугу, ответственный ошкыл.
Г.Кожевникова
Снимкыште: Р.Богомолова финалист-влак коклаште (шола гыч икымше)
