Марий тиште кече вашеш Йылмым, историйым да сылнымутым научнын шымлыше В.М.Васильев лӱмеш марий институтышто кажне ийын эртарыме регион-влак кӱкшытан «Шочмо йылме возаш кумылаҥда» краеведений конкурс иктешлалтын. Тений тудо Науко да технологий идалыкын луияшыжлан да Еш идалыклан пӧлеклалтын. Ойыртемалтше-влакым «Науко да туныктымо пашаште у йӧным кучылтмаш: вияҥме корно» институтышто эртыше шанче-практике семинар почылтмо годым торжественно палемденыт.
Чыла пашам жюри шочмо йылмылан, шке тукымлан да кугешнаш кумылым лукшо еҥ-влаклан пӧлеклалтше кум номинаций шот дене ончен да аклен, сеҥыше-влакым палемден. Жюрин еҥже семын палемдынем: тунемше-влаклан туныктышыштат, ача-аваштат полшеныт, тӱрлӧ литературым, интернетын йӧнжӧ-шамычымат кучылтыныт. Южышт пашаштлан посна презентацийым, эсогыл «еш тукым пушеҥгым» ыштыше-влак лийыныт.
Вес регион гычат тунемше-влакын ушнымышт куандарыде огеш керт. Мутлан, Татарстан Республикысе Кукмарий район гыч икмыняр паша пурен. Шке шымлымашыштым рушла возышат лийыныт.
Тений конкурсыш чылаже 42 тунемше ушнен. Нуно Волжский, Курыкмарий, Звенигово, Марий Турек, Медведево, Морко, Советский районла, Йошкар-Ола, Волжск гыч лийыныт. Иктышт изирак ийготан улыт да шочмо йылме нерген шонкалымашышт дене чылтак ӧрыктареныт, весышт шке пашаче тукымышт, интернациональный шӱлышан ешышт, воктене илыше уста еҥ-влак нерген шымлымашыштым колтеныт. Чечня сарын геройжылан пӧлеклалтше пашат лийын. Жюри тӱрлӧ ийготан категорийыште ойыртемалтше-влакым икымше, кокымшо да кумшо вер дене палемден, дипломым да шарнымашан пӧлекым кучыктен.
Семинарым почмаште Оньыжа, Марий Эл Кугыжаныш Погын депутат Эдуард Александров, тӱвыра, савыктыш да калык-влакын пашашт шотышто министрын алмаштышыже Игорь Садовин, Образований да науко министерствын, Образований институтын специалистше-влак лийыныт. Эдуард Васильевич Кугыжаныш Погын председатель Михаил Васютинын саламлымашыжым лудын пуэн.
Семинар годым икмыняр тӱҥ йодышым каҥашеныт. Мутлан, марий йылмым да сылнымутым туныктымо, тунемме-методике литературым ямдылыме пашаште у йӧн-влаклан эҥертымаш да молат. «РУВИКИ» интернет энциклопедийым ямдылыше-влакын марий йылме дене возымаште литературный нормо-влакым шотыш налмышт нергенат мутланеныт. Семинарыш 100 утла еҥ ушнен. Нуно образований, шанче, мер пашаште тыршат.
Светлана Носова
Снимкыште: «Шочмо йылме возаш кумылаҥда» конкурс иктешлалтме годым.
М.Скобелевын фотожо.
