Кугу Отечественный сарыште Сеҥымылан 79 ий теммылан пӧлеклалтын ыле 9 майыште марий рӱдолаштына эртыше военный парад.
Кажне ийын сар мучашлалтме кечын эртаралтше ты торжественный мероприятий чыла вере моткоч вучымо: Москошто ма Российысе моло олалаште. Йошкар-Оласе парадыште 1700 еҥ участвоватлен, тиде – Йошкар-Оласе гарнизонын войскаже-влак, тыгак правам аралыше орган-влакын, силовой ведомствын еҥышт, кадет ден юнармеец-шамыч. Военный техникын механизироватлыме колонныжат рӱдӧ площадь гоч эртен. Йӱштӧ лийын, но калык садак парадым ончаш погынен.
Торжественный строй тӱҥалме деч ончыч Марий Эл Республикым вуйлатыше Юрий Зайцев трибуно гыч чылаштым саламлен. «Кандашле ий лишке наре эртен, кунам калыкна икоян лийын, тушманым сеҥен. Моткоч кужун шуйнышо ныл ий жапыште, каныш, омо нерген монден, совет еҥ-влак фронтышто, тылыште фашизм деч утлымо кечым лишемденыт. Кугу Отечественный сар калыкнан лӱддымылыкшын да таҥастараш лийдыме героизмжын, фронтын да тылын ойыраш лийдыме символышкышт савырнен», – каласен Юрий Зайцев.
Марий кундем гыч Кугу Отечественный сарыш 140 тӱжем утла еҥ каен, 53 землякна «Совет Ушемын Геройжо» лӱм дене палемдалтын. Тачат республик гыч салтак-влак СВО-што нацизм ваштареш кредалыт. «Элнан эрыкшым аралыме верч кредалше-влаклан кугу таум ыштем. Историйым шояклаш, нацизмым чынлан шотлаш тӧчаш огына пу», – пеҥгыдемден регион вуйлатыше.
Кажне ийын парад годым трибуныш ӱжмӧ уна-влак коклаште сарын ветеранже-влак шагалрак улыт. Пытартыш кок ийыште СВО-што ойыртемалтше, отпускыш толшо салтак-влакым, тыгак вуйым пыштыше сарзе-влакын ача-аваштымат ужаш лиеш. Кӧ шонен, кугу сар деч вара тынар ий эртымеке, угыч тыгай жап толеш манын. Адак мемнан пӧръеҥна-влак элнан эрыкше верч кредалыт. Уло калыкна адакат кертме семын нунылан полшашак тырша. Парад годым площадь гоч эртыше кызытсе военный техникым ончен, «ме садак сеҥена» шонымаш кажныжын ушыштыжо лийын, очыни.
Кеч-мыняр шуко ий эрта гынат, Сеҥымаш кече – шинчавӱдым лукшо пайрем. Сар годым лишыл еҥжым йомдарыдыме ик ешат уке, очыни. Ты кечын «Курымашлык полк» акций эртаралтын огыл гынат, сарыште вуйым пыштыше родо-тукымыштын фотографийжым кучышо-влак лийыныт.
С.Носова
Авторын фотожо
