Республикысе Татар тӱвыра рӱдерыште У ий да шошо толмо тюрк пайрем йӱлам эртареныт.
Такшым ты пайремым тюрк ден иран калык-влак 21-22 мартыште палемдат. 2009 ийыште Наврузым эсогыл ЮНЕСКО-н Айдеме тукымын материальный огыл тӱвыра поянлыкын репрезентативный спискышкыжат пуртымо. Тудо ислам дене кылдалтше огыл интернациональный йӱлалан шотлалтеш.
Татар тӱвыра рӱдерын эртарыме пайремыш республикысе тӱрлӧ калык-влакын – азербайджан, узбек, туркмен, киргыз, таджик, грузин – еҥышт ушненыт. Нунын йӱла ойыртемым Йошкар-Олаште тунемше ӱдыр-рвезе-влак ончыктеныт. Татар рӱдерын коллективше-влакат куандареныт. Пайремын символжым – шытыштарыме пырчымат, моло чесымат ямдыленыт.
Мероприятийыш мийыше-шамычым Российысе калык-влакын ассамблейыштын регионысо пӧлкажым вуйлатыше Лариса Яковлева саламлен.
Светлана Носова
Фотом Лариса Яковлеван воткыл лаштыкше гыч налме.
