Республик вуйлатыше Марий Эл да Запорожский область гыч йоча-влакын кандаш У ий шонымашыштым шукта – Юрий Зайцев «Ёлка желаний» всероссийский акцийыш ушнен.
– Мутат уке, ме нунын кумылыштым шуктена да икшыве-шамыч пиалан лийышт, У ийым веселан вашлийышт манын тыршена, – палемден тудо.
Медведево район Шоя-Кузнецово ял гыч Илья поезд машинист лийын ончынеже. Марий Турек район гыч изак-шоляк Никита ден Илья спорт дене кылым кучаш, музыко дене заниматлаш, янлык-шамычым ончен кушташ йӧратат да У ий вашеш пӧлек-сюрпризым вучат.
Эше ик шар Морко район гыч изак-шоляк Павел, Макар да Роман деч лийын. Нунылан сӱретлаш, спорт дене кылым кучаш, кидпашам ышташ, ӱстембал модыш дене модаш келша. Нине икшыве-влак, тыгак Запорожский областьысе шефствыш налме Куйбышев район гыч Никита ден Инна У ий пайрем вашеш тыгаяк сюрприз-пӧлеклан куанат ыле манын палемденыт.
– Ӱшанем, йоча-шамыч сюпризым налыт да кумылышт нӧлталтеш. Куйбышев район – мемнан подшефный район. Мутат уке, икшыве-шамыч мемнам палат, а ынде эше нунын йодмыштым шуктышо руш Йӱштӧ Кугызамат палаш тӱҥалыт, – каласен республик вуйлатыше.
«Ёлка желаний» всероссийский акций Российыште Икымше-влакын толкыныштын темлымыж почеш Росмолодежь полшымо дене эрта. 2023-2024 ийлаште У ий жапыште мемнан регионышто йоча-шамычын 359 шонымашыштым шуктымо.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
