Вячеслав Кольцов, Марий радион службыжым вуйлатыше (начальник службы Марийского радио), Марий Эл Республикын сулло журналистше, Российын почётан радистше:
– Сад-пакчасе ӱстелтӧрыштӧ, ик еш семын погынен, кечывал кочкышым рӱжге ыштена. Мелнамат ик кӱмыжысӧ ӱйвундашыш тушкалтен сийланена. Кофемат, сырамат, пивымат подылына. Каналтен шинчымына годым анекдотымат, мыскарамат курежына, мурымат муралтена. Кокланже кеҥежым 3 шагат эр мартеат кутыркален шинчылтына.
Ой, омат ойло, ызыра ӱлай-мӱлай, ӱчашмут, чеҥгесымаш-шомакланымаш деч посна илен, ваш-ваш полышкален пашам ыштен, жапым веселан эртаренна. Нигунамат, нигуштат, икте-весынам ятлен, ӱмылташ тыршен огынал!
Эше тидымат куанен палемдынем: Раисия Михайловна садыштыже кугу ош мончам шукертак чоҥен шынден, пашашке колтен. Пытартыш ийлаште кугу, лопка мансардым ыштен. Эх-ма, илаш да илаш веле ыле вет!..
В.Осипов-Ярчан «Эх, Рая, Раисаж-а-ат…» повестьшын ужашыже-влак 12-шо (18 февраль), 14-ше (25 февраль), 16-шо (4 март), 17-ше (11 март), 19-ше (18 март), 21-ше (25 март), 25-ше (8 апрель) номерлаште савыкталтыныт. Пӱрымашым иктешлыше, чын лийше факт негызеш возымо повесть умбакыже шуйна. Эскерыза, лудса!
