«МАРИЙ ЭЛ» ТАЧЕ

У ий вашеш сай увер

 

 «Лӱдыкышыдымӧ да сай качестван корно»  националный проект илышыш шыҥдаралтмылан кӧра Марий кундемысе районлаште верланыше этнокультурный кОмплексла марте ынде миен шуаш йӧнанрак лийын да лиеш. Тидын нерген Марий Элыште проект дене кылдалтше соцкыл лаштык увертара.  

Тыгай этнотӱвыра комплексше Медведево, Морко да Шернур районлаште улыт. Мутлан, кундемнан эн йӱдвелсе Кукнур селаште марий Йӱштӧ Кугызан илемже верланен. Пытартыш жапыште тушко утларак турист тӱшка-влак коштыт. Корно лишылжак огыл, качествыже шотыштат вуйшиймаш эре лийын. Нацпроектлан кӧра 2019 ийыште Шернур – Казанский — Кукнур трассын (21-ше гыч 23-шо км) 10 километр кужытан кумдыкшым тӧрлатеныт. Подрядный организаций асфальт шартышым уэмден олмыктен. Эшежым тушто кок кӱвар лийын, тушан авыртышым, вӱд йоген каяш  решоткам келыштареныт.

А вес ийын «Лӱдыкшыдымӧ да сай качестван корно» нацпроект дене келшышын, Йӱштӧ Кугызан илемышкыже наҥгайыше корным ыштат. Тудын кужытшо 12,8 километр наре шуйна. Тидын нерген «Марийскавтодор»  ГКУ-н директоржо Константин Шихов  палдарен.

Морко районысо Шлань ялыште верланыше «Унчо» этнокультурный комплексыш наҥгайыше Морко — Уньжинский автомобиль кугорнымат нацпроект кышкарыште 18 километржым уэмден олмыктымо. Кугорно пале, сигнальный меҥге-влакым келыштарыме.

Йошкар-Оле деч тораште огыл верланыше «Уна Кудо» этнокомплекс Медведево районысо Ким ялыште ышталтын. 2020 ийыште Юшково гыч Ким марте наҥайыше корным тыгак олмыктеныт. Уна кудыж мартеже кок кугорно денат миен шуаш лиеш: Йошкар-Ола – Уржум да Кузнецово – Юшково.

Пытартыш кум ийыште марий рӱдолаштат тӱшка калыкын погынен пайремлыме кумдыклажымат палынак шотыш конденыт.

С.Носова

Опубликовать в Одноклассники

Добавить комментарий