Тенийсе идалык мо дене шарналт кодын, маныда? Тазалык верч кучедалмаш дене. Таза улат – пашат кая. Тидлан кӧрат дыр бизнесым шкетын вӱдымӧ деч кораҥынам, торгайыме объектлам лишыл еҥ-влаклан, тидын шотыштак эргымлан, арендыш пуэнам, а производство – ӱдыр ӱмбалне. Ӱдыремже кызыт Москвасе кугыжаныш университетыште предпринимательстве дене шинчымашым пойдара гын, тудын организацийыштыже директор пашам шукташ мылам логалеш. А производствылан кызыт поснак кугу тӱткыш ойыралтеш. Кинде ден булко изделийым кӱэштме, пельменьым да моло кочкышым ямдылыме производствыш тений 8 миллион теҥге наре инвестиций пышталтын.
А инвестицийым пыштымеке, тидын деч могай-гынат пайдам налман – шушаш ийысе задачына лач тыгай. У Торъялыште у пекарньым пашаш колташ шонена, у паша вер почылтеш.
У ий саламлымаштем адакат тазалык йодышыш пӧртылнем. Кодшо ийын кум гана «Вашке полыш» дене наҥгайышт. Тений ий мучко эм деч посна илен лектым. Мо кӱшеш, шонеда? Тазалыкым йолын коштмо да гимнастике дене пеҥгыдемден. Палыме доктор Александр Шишонинын темлымыж почеш шкемым шуараш тӱҥальым. Кажне кечын 10 утла километрым йолын коштам – тыглай огыл, а талын. Тыландат тазалыкым тыгай йӧн дене пеҥгыдемдаш тыланем. Шкендам перегыза да шуарыза! Тунам пашадат ушнен толеш, шонымыдат шукталтеш.
Н.А.Гусев,
индивидуальный предприниматель
