Тенийсе идалык куштылгак огыл ыле, но игече чоҥаш келшыше лийын. Санденак ныл объектым сдатлышна. Иктыжым, Йошкар-Олаште Марий кугыжаныш филармонийын зданийжым, кужун чоҥаш логалын, но тидыже мемнан дене огыл, кужун финансироватлыме дене кылдалтын. Но тӱҥжӧ – шуктымо да удан огыл. Тыгак Медведево посёлкышто 825 тунемшылан ситыше школым, пошкудо Чебоксар олаште 250 веран йочасадым писын нӧлтышна. Килемар черкым шуктышна. Чылаже 1 миллиард утла теҥгеаш паша ышталтын.
Вес ийланат планна изи огыл. 1 сентябрьлан Чебоксарыштак 1650 тунемшылан ситыше школым шуктышаш улына. Тудо Юл кундем федерал округышто ик эн кугу лиеш. Чоҥаш тений майыште тӱҥалынна. Контракт почеш чумыр акше – 1 миллиардат 100 миллион теҥге. Тыгак Йошкар-Оласе Фестивальный уремыште 9 пачашан илыме пӧртым чоҥыман. Моло объектше торг деч вара рашемеш.
Республикысе, районысо чыла чоҥышым, нунын ешыштым, вет У ий – тиде еш пайрем, шушаш У ий дене саламлем. Эртыше ийыште ме мом ыштенна – тиде шушаш ийлан чапле негыз. Тек шушаш ийыште ыштымынат ончыкылан сай эҥертыш лиеш. Ваш-ваш эҥертыде да лийжак манын тыршыде, нимо ок ышталт, ок чоҥалт. Кумылда нӧлтшӧ лийже, чоҥышо-влак!
Ю.Л.Васенёв,
«Медведево ПМК» ПК-н председательже
