2 ноябрьыште Марий Элыште «Единый Россий» партийын первичный пӧлкаже-влакын региональный советыштын икымше заседанийже эртен. Партийын Марий региональный пӧлкашкыже «Единый Российын» 14 тӱжем утла членжым ушен шогышо 544 первичный отделенийже пура.
Региональный советын заседанийже Марий Эл Республикын мер полыш штабыштыже эртен. Тушто Марий Элым вуйлатыше Юрий Зайцев лийын.
Заседанийыш погынышо-влак ончылно ойлымыж годым регионым вуйлатыше тыге палемден: первичный пӧлка-влакын секретарьышт партийын региональный пӧлкаже-влакым вияҥдымаште кугу пашам шуктат. Нунын калык да депутат корпус дене пырля пашам ыштымышт дене Марий Эл Республикын ончыкылык пӱрымашыже да вияҥмашыже чак кылдалтыт.
«Единый Россий» партий 2024 ий июльышто партийын первичный пӧлкаже-влакын советыштым ыштен. Тушко чыла регионын представительышт пуреныт. Марий Эл Республик деч советыш Нинель Докучаева логалын.
Тиде кечынак «Единый Россий» партийын Марий Региональный пӧлкажын Региональный политсоветшын Президиумжын заседанийже лийын. Тушто 22 йодышым ончымо. Тӱҥ йодыш семын партийын Марий Региональный пӧлкажын XXXIV конференцийжылан ямдылалтме да тудым эртарыме шотышто мероприятийлам каҥашыме. Конференцийым 2024 ий 22 ноябрьыште эртараш пунчалме.
Марий Эл вуйлатышын пресс-службыжын уверже негызеш Павел Шакиров ямдылен
Д.Речкинын фотожо/Марий Эл вуйлатышын пресс-службыжо
