Кызыт республикыштына Марий Эл вуйлатышын У ий ёлкыжо-влак эртат. Тений нине пайремыш чылаже 2000 утла йочам ӱжыныт. Чылаже 9 тыгай ёлко палемдалтын.
23 декабрьыште республикысе курчак театрыште специальный военный операцийын участникше-влакын икшывыштлан, тыгак олимпиадылаште, научный, технический, усталык конкурслаште, выставкылаште, фестивальлаште, спорт таҥасымашлаште сеҥыше, йоча мер илышыште чолгалыкым ончыктышо-влаклан У ий пайрем лийын. Ӱдыр-рвезе-шамыч йомак представленийым онченыт да регион вуйлатыше Юрий Зайцев деч лачка пӧлекым налыныт.
Юрий Зайцевын лӱмжӧ дене погынышо-влакым республик вуйлатышын администрацийжым вуйлатыше Лидия Батюкова саламлен да поро тыланымашым ойлен.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
