Рушарнян, 2 сентябрьыште, Марий Элыште Кугыжаныш Погыныш депутат-влакым ешарен сайлымаш эртен.
Тиде кечын республикыште 65 избирательный участке пашам ыштен.
Сайлымаш тыгай избирательный округлаште эртен:
— Йошкар-Олаште Гомзовысо 8-ше №-ан ик мандатан,
— йӱдвел-эрвелысе 19-ше №-ан ик мандатан (Кужэҥер ден Параньга муниципал районлаште);
— Советскийысе 26-шо №-ан ик мандатан (Советский муниципал район кумдыкышто).
Нине избирательный округлаште чылаже 68526 регистрироватлалтше сайлыше шотлалтеш.
Рушарнян еҥ-влак теве кушто да мынярын йӱклаш миеныт:
— 8-ше №-ан округышто – 2598 еҥ але 12,46 процент;
— 19-ше №-ан округышто – 10623 еҥ але 42,95 процент;
— 26-шо №-ан округышто – 8723 еҥ але 38,02 процент.
Ятыр избирательный участкыште, тыгак йӱклымӧ пӧлемыште да пӧлемыште огыл эртыше йӱклымаштат кандидат ден нине кандидатым темлыше избирательный объединений-влакын еҥышт лийыныт. Республикысе избирательный участкылаште рушарнян чылаже 139 наблюдатель ден комиссий-влакын совещательный йӱк праван 82 еҥ лийыныт.
Тидын дене пырля избирательный комиссий-влакын пӧлемлаштышт видеофиксаций йӧным кучылтыныт.
Марий Эл Республикын Рӱдӧ сайлымаш комиссийжын палдарымыж почеш, сайлымаш кечын избирательный законодательствым пудыртымо нерген вуйшиймаш пурен огыл.
Марий Эл Республикын Кугыжаныш Погынышкыжо депутат-влакым ешарен сайлымашке кокла шот дене налмаште 32,02% калык миен.
Тыгак 2 сентябрьыште Йошкар-Оласе Депутат-влак погынымашыш Ураевысе 12-шо №-ан ик мандатан избирательный округышто депутат ешарен сайленыт.
Тиде кечын кажне гаяк участкыште могай-гынат мероприятий лийын. Сайлымашке толаш еҥ-влакым кумыландаш манын, участкылаште весела программым ямдыленыт, концертым ончыктеныт, тӱрлӧ специалист-влак пайдале каҥаш дене полшеныт.
Л.Камалетдинова.