Марий Эл вуйлатышын пашажым жаплан шуктышо Юрий Зайцевын 2022 ий 30 июньысо 92-шо №-ан кӱштымашыже почеш, Марий Эл правительстве председательын икымше алмаштышыжлан Морко районысо Усурт ялын эргыже Евгений Кузьминым шогалтеныт.
Марий шанчызе, историк, мер пашаеҥ, историй шанче кандидат (2009 ий), Марий Эл Республикысе С.Г.Чавайн лӱмеш Кугыжаныш премийын лауреатше (2011) 2019 ий гыч Марий Эл Кугыжаныш Погынын шымше созывшын депутатше да Кугыжаныш погын председательын алмаштышыже лийын, тыгак тудо 2017 ий гыч В.М.Васильев лӱмеш Йылмым, сылнымутым да историйым шымлыше институтын директоржын пашажым шуктен.
Марий Эл Тӱвыра, савыктыш да калык паша шотышто министерствын увертарымыж почеш, В.М.Васильев лӱмеш Йылмым, сылнымутым да историйым шымлыше институтын директоржын пашажым жаплан шуктышылан Людмила Григорьевам шогалтеныт. Тудо 1973 ий 22 июльышто Морко районысо Шап Унчо ялыште шочын, Марий кугыжаныш университетын историй-филологий факультетшым тунем пытарен, вузын аспирантурыштыжо шинчымашым поген. 1995-1997 ийыште республикын Политехнический лицейыштыже марий йылмым да литературым туныктен, 2000-2003 ийыште Марий кугыжаныш университетын финн-угор филологий кабинетшын заведующийже лийын, 2003-2006 ийыште – кугурак преподавательже, 2006-2008 ийыште – финн-угор йылме-влак кафедрыжын доцентше. 2008 ий сентябрь гыч тудо МарНИИЯЛИ-н йылме пӧлкажым кугурак шанче пашаеҥжылан ышташ тӱҥалын, тидын годымак Марий кугыжаныш университетыште общий да финн-угор языкознаний кафедрын доцентше лийын, а 2013 ий гыч – МарНИИЯЛИ-н учёный секретарьже, 2016 ий гыч – институтым вуйлатышын алмаштышыже, 2016 ий август гыч 2017 ий март марте директорын пашажым шуктен.
Людмила Григорьева – филологий науко кандидат (2003 ий), доцент (2006 ий), 70 утла шанче да учебно-методический пашан авторжо, Марий Элысе кугыжаныш йылме-влак шотышто правительстве комиссийын еҥже, Марий Эл вуйлатыше пеленысе Кугыжаныш молодёжь премийже-влакым палемдыме шотышто комиссийын еҥже, Россий шанче фондын проектше-влак шотышто координатор.
Г.Кожевникова
