Юл кундем кугыжаныш технологий университетын Йошкар-Оласе аграрный колледжше пелен ыштыме «Агротехник» тунемме-производство кластерыш тунемаш пурымо приёмный кампаний август кыдалне мучашлалтын.
2023 ий 20 июнь гыч палемдыме жап марте абитуриент-влак деч чылаже 2800 йодмаш пурен, тышеч «Профессионалитет» программе дене – 300 наре. Тунемаш пураш кумылан-влак Марий Элын тӱрлӧ районлаж гыч веле огыл, тыгак Нижний Новгород, Киров областьла гыч улыт. Приёмный кампаний мучко абитуриент да нунын ача-авашт дене специалист-влак ( коклаштышт педагог-психологат лийын) пашам ыштеныт да чылаже 250 индивидуальный консультацийым пуэныт.
Палемдыман, тунемаш пураш кумылан-влак кокла гыч 65 процентше Почмо омса кечын, «Профессионалитет: тый сай компанийыште улат!» Россий кӱкшытан класс шагатын участникше лийыныт. Шукынжо интерактивный производство эксурсийлашке, мастер-класслашке ушненыт да профессионал тергымашым кластерын партнёржылан шотлалтше предприятийлаште эртеныт.
Колледжын амбассадоржо-влакым мокталташ гына кодеш. Нуно кажне кечын приёмный кампаний годым дежуритленыт, «Профессионалитетын» программыж дене палдареныт, ялозанлык направлений дене таче кечылан ик эн йодмашан специальность нерген кумдан каласкаленыт, выпускникын карьер картыжым ончыктеныт. Икманаш, колледжын тунемшыже ден туныктышыжо-шамыч моткоч кугу пашам ыштеныт да арам огыл – лектыш шинча ончылнак.
Г.Кожевникова
Фотом Йошкар-Оласе аграрный колледжын сайтше гыч налме
