Коча-кова, илалше радамыш ушнышо ача-ава-влак, ме чыладамат тиде сылне пайрем дене уло кумылын саламлена!
Тиде кечын тендан лӱмеш тауштымо ятыр мут йоҥгаш тӱҥалеш. Тидыже тыгак лийшаш, вет те пашада, тыршымыда, чон шокшыда дене тидым тӱрыс суленда да суледа! Те мыланна эреак эҥертышна да полшышына лийында да улыда! Тидлан тыланда моткочак кугу таум ойлена! Ончылныда вуйнам савена!
Мемнан редакцийыште шке пашаштым чот йӧратыше еҥ-влак гына тыршат. Тидым пеҥгыдын каласен кертына. Арам огыл южышт эсогыл сулен налме канышыш лекмекыштат мӧҥгыштышт яра шинчен огыт керт. Чоныштак огеш чыте, сандене пенсий ийготыш шумекат, коллективна гыч каен огытыл. Тыгайже мынярын лийыныт?!
Илалше радамыш ушнышо пашаеҥ-влак кызытат мемнан радамыште улыт. Нуным да ветеранна-влакым чылаштымат пайремышт дене саламлена да эн тӱҥжӧ, пеҥгыде тазалыкым тыланена. Тек лишыл еҥда-влак аклат, пагалат, йӧратат, чаманат. Тек шӱм-чоныштыда да ешыштыда ласкалык озалана. Ласкалык уло гын, тугеже илышыштат чыла сай. Тек ӱмырда кужу да куандарыше лиеш!
«Марий Эл» газет редакцийын коллективше
