Тений республикын правительствыже школ учебниклан 39,3 миллион тенгем ойырен. Тиде кодшо ий дене таҥастарымаште кум пачаш шукырак.
«Яра» учебник нерген йодышым Марий Эл вуйлатыше А.Евстифеев республикын образований сферыштыже ыштыше-влак дене вашлийме годым каҥашен.
Марий Эл правительстве председательын икымше алмаштышыже М.Васютинын палемдымыж почеш, школлам у тунемме ийлан ямдылыме пеҥгыдемдыме график дене келшышын кая. Тачысе кечылан Марий Элысе чыла школым комиссий ямде улмылан шотлен.
98 школышто ачалыме паша каен, икмыняржым капитально олмыктеныт. Кугу тӱткышым леведышлан ойыреныт. Волжскысо, Йошкар-Оласе, Медведево ден Килемар районласе школ-влакын (чылаже 20 тунемме вер) леведышыштым вашталтеныт. Чылаже – вич тӱжем квадрат метр кумдыкым. Волжск оласе куд, Йошкар-Оласе кок, Звенигово районысо ик школышто да кок кугыжаныш общеобразовательный организацийыште пластик окнам шынденыт. Волжскысо, Йошкар-Оласе, Медведево районысо ныл школышто спортзалым олмыктеныт.
Сентябрьыште индеш спортзалым капитально ачален шуктат: Килемар, Кужэҥер, Медведево, Морко, Оршанке, Шернур, Советский, Юрино районласе, Йошкар-Оласе школлаште, Шернур районысо Казанский, Семёновко, Савинысе специальный общеобразовательный школ-интернатлаште.
Республикын Образований да науко министерствыжын палемдымыж почеш, чыла школышто пожарный сигнализаций, увертарыме ден эвакуацийым виктарыме системе уло. Тений 12 тунемме верын кочмыверышкыже 197 тӱрлӧ оборудованийым налме. Шернур район Купран ден Параньга район Элпанур школлаште шокшо шонданым ыштеныт. Каласыман, Элпанурышто тений декабрьыште у школ оралтым чоҥен шуктышаш улыт.
Марий Эл вуйлатыше А.Евстифеев рӱдоласе Ян Крастынь уремыште школым нӧлтымӧ нерген Йошкар-Олан мэрже Е.Маслов деч йодын. Евгений Васильевич аукционым эртарыме нерген каласен.
Александр Евстифеев йочасадлаште вер ситыдыме темымат тарватен да Йошкар-Олаште мыняр йочасадым сдатлаш ямдылалтмым да кызыт мыняр чоҥалтмым рашемден.
Евгений Масловын мутшо почеш, кызыт вич йочасад нӧлталтеш. Иктыжым, Ураев уремысе 195 веран йочасадым, тений сентябрь тӱҥалтыште пашаш колтат. Тылеч посна «Спортивный» микрорайонышто «коробкым» ыштен шуктеныт. Тиде 135 веран йочасад лиеш, тудым вес ийын почаш палемдыме.
Марий Элын образований да науко министрже Н.Адамова республикысе школ-влаклан учебникым, тунемме пособийым ситарыме нерген увертарен. Тений ик тунемшылан учебниклан 830 теҥгем ойыреныт. Ӱмаште тиде пашалан 150 теҥгем гына пуэныт. А.Евстифеев ончыкыжым учебниклан оксам утларак ойыраш да нуным цифр йӧныш кусараш кӱлмым палемден.
Наталья Адамова педкадрым ситарыме йодышым тарватен. Республикысе школлаште 242 туныктышо кӱлеш. Оласе школышто 140 туныктышо, а селасыште 102 туныктышо огеш сите.
Марий Эл вуйлатыше тиде йодышым тӱткынрак ончалаш да район вуйлатыше-шамычлан самырык специалистлан илыме верым ойыраш кӱштен.
1 сентябрьыште Марий Элыште шке омсажым 252 школ почеш. Тушечын 82 – оласе (кум кас школ), 170 – селасе (кок кас школ). Парт коклашке 77 тӱжем 256 икшыве шинчеш. Школыш икымше гана индеш тӱжем наре йоча толеш. Тидыже ӱмашсе дене таҥастарымаште 297 ӱдыр-рвезылан шукырак.
Марий Эл вуйлатышын организаций ден аналитике виктемжым уверже негызеш Л.ШАБДАРОВА ямдылен.
