Тылын полышыж деч посна – нигузе!
Спецоперацийыште элнан эрыкше верч нацизм ваштареш шогышо боец-шамыч тылын полышыжым шижшашак улыт.
Шукерте огыл Волжский район Купсола села гыч гуманитар полышым колтеныт. Тудым Михаил лӱман пӧръеҥ 15 сентябрьыште ДНР ден ЛНР-ыш намиен шуктышаш.
– Чолгалыкыштым ончыктымыштлан Разваловмыт ешлан, Юрий Ашкельдинлан, «ДоброДеи» фондлан, Алексей Семёновлан, районышто илыше калыклан малыме мешакым, кочкышым, кӱлеш вургемым погымыштлан кугу тау, – манеш тиде пашалан вуйын шогышо да жапын-жапын гуманитар полышым шкеак наҥгаен кодышо Александр Глухов.
СВО-што кредалше боецна-влакат гуманитар полышлан тауштен возат, да мо кӱлешым радамлен йодыт.
«Марий Эл гыч лӱддымӧ еҥ-влаклан кугу тау. Ме казачий подразделенийыште улына. Тушто элнан тӱрлӧ кундемже гыч служитлат. Вашке йӱран игече тӱҥалеш, сандене окоплаште ночко лиеш, полиуретан кем моткоч кӱлеш.
Можыч, теве тыгай йодмашым шуктен, мыланна поген кертыда:
• Одеал, кӱпчык – 30 штук;
• маскировочный сетке;
• сигарете, чай, кофе;
• медикамент, гигиене средства;
• йымалйолаш, носки, термовургем;
• вӱдыжгӧ деч полиуретан кем (42-46 размерым, мыняр кертыда);
• сусыргышо-влаклан госпитальыш малыме мешак.
Шке кондеда гын, вашлийына. Патырна-влак дене палыме лийыда», – рашемден Михаил Моисеев.
– Афганистаныште служитлыше, кызыт СВО-што улшо йолташ Юра Басманов, боец-влак йодыт, – рашемда Александр Глухов. – Тидымат умылем, южышт «шерым теменда» манынат кертыт, но тылын полышыж деч посна нигузе. Тыл ончычат фронтлан эреак полшен. Пырля гына тушманым сеҥен кертына. А шужышо, кылмыше боец – боец огыл.
Российысе да вес элласе сарзе казак-влакын ушемыштын Марий Элысе региональный отделжын (СКВРиЗ), спорт дене кылдалтше военно-патриотический шӱлышан «Покровский» хутор ХКО-н казакше ден кадетше-влакын вуйлатышышт Александр Глухов ӱдыр-рвезе-шамычым патриотизм шӱлышан тӱрлӧ мероприятийлан ямдыла, таҥасаш кумылаҥда.
Тыл – фронтлан
Волжский район Купсола селасе прихожан, казак да чолга еҥ-влак боецна-шамычлан кажне кечын маскировочный сеткым пидыт. Мутлан, 30 августышто Херсон областьыш 10 сеткым колтеныт.
– Пытартыш гана гуманитар полышым намиен кодымо деч вара жап шуко эртен огыл, ме спецоперацийыште кредалше-влаклан мо кӱлешым адакат погаш тӱҥалынна. Госпитальыште сусыргышо-влак шукын улыт, эреак ешаралтыт. Шукыштын кочкаш совлаштат уке. Воинна-шамычлан полшаш кӱлеш. Келгашан кӱмыжым, совлам, кружкам, йӱаш вӱдлан баллоным, флягым але печкем, мушмо средствам наҥгайыман. Бинтым, вӱр йогымым чараш жгутым, турникетым, шприцым, системым, температурым волташ полшышо эмым, нерлан спрейым, спиртан да вӱдыжгӧ салфеткым, костыльым, кресло-каталкым, тростьым, антисептикым наҥгаяш погена. Пушкыдырак медицине носилка, дизельный инструмент, машиным олмыкташ инструмент набор, генератор кӱлыт. Тыгак – пужлыдымо кочкыш.
Лекше йодышым тыгай телефон дене рашемдаш лиеш: 89178644659 (Михаил), – манеш Александр Глухов.
Елена Эшкинина
