Акций эрта
«Тыгыде окса арня»
Республикыште илыше-влак шке оксаштым счётыш пыштен, тыгак банк-влакын южо офисыштышт тыгыде оксаштым кугураклан комиссий деч посна вашталтен кертыт. 20 май гыч 2 июнь марте Российысе регионлаште «Тыгыде окса арня» эрта.
Тыгыде оксам вашталташ акцийыш ушнышо банк отделенийлашке паспорт дене толман. Вашталтыме жап кужун ынже шуйно манын, тудым ак шот дене ойырен ямдылыман.
Россий банкын кызыт пайдаланыме кеч-могай тыгыде оксажым вашталташ лиеш. Кеч-мыняр да кеч-могай оксам налыт: шемемшым, вульышым, тодылалтшым, удыралтшым але шӱтымым.
Кодшо ийын тыгай акций годым республикыште илыше-влак 430 тӱжем теҥге акаш 100 тӱжем наре тыгыде оксам сдатленыт.
Акцийым эртарыме условий банк-влакын тӱрлӧ отделенийыштышт ойыртемалт кертеш. Тыгыде оксам сдатлыме але кугураклан вашталтыме нерген уверым акцийыш ушнышо банк-влакын отделенийыштышт але Монетная неделя.рф акцийын сайтыштыже рашемдаш лиеш.
Ю.ИСАКОВ ямдылен
Марий Эл Республик НБ-отделений деч налме фото
