Кужэҥер районысо «Тумьюмучаш» ООО пасу пашам ий еда жапыштыже эртарен колта да начар огыл лектышыш шуэш. Теве кызыт озанлыкыште механизатор-влак уло вийым пуэн тыршат.
– Тений ме икияш пырчан да отызан кушкылым 1160 гектарыш вераҥдышаш улына, апрель мучашлан кудло процентыштыже ӱденна, – каласкала озанлык вуйлатыше Владимир Таныгин. – Тений икияшым ӱдышаш чумыр пасум кодшо шыжым кылмаш куралын коденна ыле, сандене ынде мландыште вӱдыжгым арален кодаш куштылгырак. Нурыш ӱдышӧ кум агрегатым луктынна. Механизатор-влак Виктор Соколов ден Станислав Куклинын виктарыме агрегат-влак пырчан культурым вераҥдат гын, Олег Капустин люцерным ӱда. Чыланат тыршат, пашаче улыт. Нунылан тичмаш куатын пашам ышташ чыла условийым ышташ тыршенна.
Озанлык технике паркым ий еда уэмдаш тырша. Теве кодшо ийын гына Китайыште лукмо Йота маркан тракторым налме. Тудым тений Валерий Шибанаевлан виктараш ӱшаныме да кызыт икияшым ӱдышаш мландым пушкыдемден ямдыла.
Ушемын бухгалтерийыштыже опытан пашаеҥ-влак Надежда Горохова ден Алевтина Шибанаева тыршат. Сеҥымаш кече вашеш Коҥганур кыдалаш школын тунемшыже-влак нунылан Георгиевский лентым конденыт, совет салтак-влакын подвигыштым чапландараш кумылаҥденыт.
– Меат Сеҥымаш кече лишеммым уло шӱм-чонна дене шижына да тиде куанле жапым аклена, – палдарыш бухгалтер Алевтина Шибанаева.
Снимкыште: механизатор Валерий Шибанаев – пасушто.
Фотом «Тумьюмучаш» ООО-н воткыл лаштыкше гыч налме.
