У ий пайрем деч вара Марий Элын Пӱртӱс поянлык, экологий да йырым-йырысе средам аралыме шотышто министерствын кугыжаныш инспекторжо-влак телымсе маршрут учётым эртарат.
Тидыже кундемыштына мыняр да могай янлык илыме чотым рашемдыме дене кылдалтын. Ты пашаш «Кугу Какшан» заповедникын инспекторжо-шамычат ушнат. Мутат уке, кажныжлан гаяк ече ӱмбаке шогалаш логалеш. Телым чодыра коклаште янлык кыша почеш, лумым келын, йолын кошташ куштылгыжак огыл. Тиде паша тугакшат неле. Ончыч эртышашлык кумдыкым палемдыман, корно схемым ыштыман. Мыняр кужытым, маршрут чотым эртымым рашемдыман. Ончылгоч кушто, могай кумдыкышто могай янлык илымымат палыман. Заповедникыште тыгай учет 26 гана лиеш. Тудын гоч тӱҥ шотышто шордын, шурмаҥшын, пирын, рывыжын, луйын, пушаран, коляйосын, коман, урын, мераҥын, ирсӧснан да тыгак музын, сузын, кӱдырын чотыштым рашемдат. Мутлан, пытартыш ийлаште шордо ок шагалем, 50 гыч 70 вуй наре уло. Кок шурмаҥше уло.
Мутат уке, инспектор-влак ты пашам шке вийышт дене гына шуктен огыт керт. Сандене нунылан сонарзе, егерь, министерствын моло специалистше-шамычат полшат. Учет февраль мучаш марте шуйна.
С.НОСОВА
