КУЧЕМЫШТЕ УВЕР ЙОГЫН

Ончылно лийнет гын, тыят ушно!

31 декабрьыште Марий Эл вуйлатыше Юрий Зайцев Йоча-влакын да молодёжьын Российысе толкынжын республикысе первичный отделенийжым почмо марафонлан стартым пуэн. У организаций «Движение первых» лӱмым нумалеш.

Толкынын миссийже ончыкылык Российлан моткоч кӱлешан, палемден республик вуйлатыше торжественный мероприятийыш чумыргышо-влакым саламлышыжла.

«Тиде мемнан эллан, еҥ-влаклан – мыланна чылалан кӱлеш. Российсе толкын йоча-влакым да молодёжьым иквереш уша манын ӱшанем, а ме, кугыеҥ-влак, тыланда полшаш эре ямде улына. Мемнан полышлан ӱшанен кертыда. Ме пырля ончыко кайышаш, ончылно лийшаш улына», – каласен Юрий Зайцев.

«Движение первых» регионысо отделений Йошкар-Оласе Йоча да самырык-влакын усталык полатыштышт почылтын. Кеҥеж жапыште мероприятий-влакым «Лесная сказка» эмлыме да тазаҥдыме комплексын, ола воктенысе «Радужный» йоча образовательный рӱдерын, молодёжым военно-патриотический шӱлышеш воспитатлыме «Авангард» рӱдерын площадкылаштышт эртараш тӱҥалыт.

Йоча-влакын да молодёжьын Российысе толкыныштым 2022 ийыште ыштыме. Тудын шонымашыже – подростко-влакын яра жапыштым пайдалын эртарыме пашам виктарен колташ, нунын тӱняумылымашыштым шӱм-чон поянлык йӱла негызеш пеҥгыдемдаш. Эскерыше советым Россий президент Владимир Владимирович Путин вуйлата.

18–22 декабрьыште икымше съезд чумырген, тушто толкынын лӱмжым ойырен налме, ыштышаш пашам палемдыме. Ончыкылык корно сай ӱшаным гына пуышо: сай качестван шинчымашым налаш, тӱвыра илышыш ушнаш, волонтёр радамыште лияш, эртыше илыш нерген шарнымашым арален кодаш, таза илыш йӱлам кучаш, экологий проект-влакым шыҥдараш, пӱртӱсым аралаш, Российыште туризмым вияҥдаш.

Съездыште Российын 89 регионжо гыч йоча-влак, нунын коклаште – Луганск да Донецк Калык Республикла, Херсон да Запорожье областьла гычат лийыныт.

Марий Эл Республикым вуйлатышын администрацийжын информаций паша пӧлкажын уверже негызеш

Л.СЕМЕНОВА ямдылен

Д.Речкинын фотожо

 

Опубликовать в Одноклассники

Добавить комментарий