Йошкар-Олаште ӱмаште декабрьыште Мер-политике рӱдерыште «Мыйын туныктышем» ончер пашам ыштен.
Тушто республикысе йоча сымыктыш школлаште тунемше йоча-влакын шӱдӧ утла сӱретыштым чумыреныт. 2023 ий Педагогын да наставникын идалыкышт семын эртен, санденак тунемше-влакат ты темылан пӧлеклалтше сӱретлам «шочыктеныт».
Радыналаште тӱҥ герой – туныктышо, преподаватель, наставник. Тудыжо мом гына ок ыште! Школышто йоча-влакым туныкта, пӱртӱсыштӧ икшыве-шамыч дене пырля сӱретла, шун гыч тӱрлӧ арверым ненча. Но тыгодым — тудо эре йоча-влак коклаште. Сӱретлаште тӱрлӧ предметым туныктышо-влакым ончыктымо. Тушто музыкант, кидмастар, сӱретче, тренер, физик, йылмызе улыт. Поснак Диана Лебедеван «Ме тендам пеш чот вучена!» пашаже кумылым налеш. Шижалтеш, тиде йоча шке туныктышыжым моткочак йӧрата.
Ончерыште чумырымо кидпаша-влак коклаште гран-прим И.С.Палантай лӱмеш тӱвыра да сымыктыш колледж пелен пашам ыштыше национальный сымыктыш гимназийыште тунемше Даниил Александров налын. Тудын «Йӧратыме туныктышем» сӱретше сеҥышыш лектын. Туныктышыжо – сӱретче Елена Сарафанникова. Даниил шкежат труба дене шокта. Сандене музыкым туныктышыжо Сергей Пропутиным саксофон дене ончыктен. Ты сӱретыште тунемшын туныктышым пагалымыже, кугешнымыже шижалтеш. Лач тыгай педагог йочан чоныштыжо сай да поро кышам ӱмырешлан кода.
М.СКОБЕЛЕВ
Л.ШАБДАРОВА
М.Скобелевын фотожо
Снимкылаште: 4270 Гран-прим налше Д.Александровын «Йӧратыме туныктышо» радынаже. 5346 Йошкар-Оласе 1-ше №-ан йоча сымыктыш школын туныктышыжо М.Клюкина – занятий годым.
