ОБРАЗОВАНИЙ СТАТЬИ ШКОЛ ЙОЛГОРНО

«Туныктышак лиймем шуын»

Тыге ойла Волжский район Пӧтъял кыдалаш школын самырык педагогшо Анна Михайлова.

Пытартыш жапыште «Школыш самырык туныктышо-влак огыт тол» манмым чӱчкыдын колат, туге гынат тиде радамыш чылаштым пурташ ок лий.  Улыт мемнан кундемыште йоча-влакым, туныктымо пашам, школ илышым уло шӱм-чон дене йӧратыше самырык педагог-влакат. Нунын кокла иктыже – Волжский район Учимсола ялын ӱдыржӧ, Пӧтъял кыдалаш общеобразовательный школышто физикым да математикым туныктышо Анна МихайловаМо эн тӱҥжӧ – шке жапыштыже тудо тиде тунемме верыштак шинчымашым поген. Молан ӱдыр туныктышын профессийжым ойырен? Тиде йодышлан Анна Николаевна тыге вашештыш:

– Мый изи годым школла модаш йӧратенам. Ала-молан эреак туныктышак лийме шуын. Тиде школыштак физикым туныктышо кызытат ойла: «Доска деке лектатат, туныктышо семынак коят ыле. Туныктышак лият манын шоненам».

Школ деч вара ӱдыр Марий кугыжаныш университетын педагогический институтшын общий да профессиональный образований факультетышкыже тунемаш пурен. Ик жапыште Шарача школышто пашам ыштен, а 2024 ий гыч Пӧтъял школышто тырша.

– Луымшо  да латикымше класслаште физике, математике предметла дене шинчымашым шке туныктышемак пуа гын, мый моло класслам туныктем, – ойла Анна Николаевна. – Чынжым гын, тиде школысо туныктышо-влак мыйым чылан туныктеныт, сандене нунын деке полышым йодын мием гын, кеч-кунамат полшат, сай ой-каҥашым пуат. Паша опыт гына кызытеш ок сите. Тудо моткоч шагал, сандене урокым эртарыме годым нелылык шижалтеш. Туге гынат шинчымашем келгемдем, эре тунемам. А йоча-влакым мый йӧратем, нунын дене вашкыл уло. Тунемше-влак тыршат, но, чаманен каласыман, ме шке жапыштыже эшеат тыршыше лийынна, заданий-шамычым шке гыч ышташ тыршенна, а кызыт телефон гыч возен налме чӱчкыдын вашлиялтеш. Мутлан, мӧҥгысӧ пашам «визытан» отметкылан ыштен конда, а доска леке ышташ луктат – ок мошто. Эше весе. Школым тунем пытарымемлан индеш ий гына эртен. Тиде тунемме верыштак ме, йоча-влак, чыланат марла мутланенна, а таче тыштак ӱдыр-рвезе-шамыч рушла гына ойлат.

«Школыш пашам ышташ толмылан огыда ӧкынӧ?» йодышемлан Анна Николаевна шыргыжале:

– Уке, тиде мыйын, шонем. Кызыт визымше классем уло, вуйлатышышт улам. Мылам школышто пашам ышташ келша.

Г.Кожевникован фотожо

Опубликовать в Одноклассники

Добавить комментарий