Морко кундемын шочшыжо, Йошкар-Олаште пашам ыштыше Олег Иванов илышыжым шахмат дене кылден.
Уш-акыл пӱсылыкым йодшо модмашлан школыш тунемаш кайымыж деч ончычак шӱмаҥын. Эргыштын мастарлыкшым вияҥден колташ ачаж ден аважат эреак полшеныт. Нылымше класс гыч шахмат кружокыш коштын. Тренер Геннадий Иванович Путиловын тыршымыж дене спортын ты видшым эшеат йӧратен да школышто тунемше-влаклан эртаралтше таҥасымашке лекташ тӱҥалын. Тидыже тудлан эшеат келшен, садлан рвезе шахматлан тӱткышым утларак ойырен, тӱрлӧ книгам лудын, чапланыше шахматист-влакын партийыштым тунемын. Адакшым илышыштыжат шкеж гаяк кумылан еҥ-влакым вашлийын да уш-акылым тергаш йӧн эреак лектын. Тыге Олег Иванов шахмат модмаште ойыртемалтын.
– Тӱняжак мылам вес семын кояш тӱҥалын, – манеш тудо. – Икымше гана нылымше классыште тунемме годым районысо таҥасымаште кугурак ийготан-влак дене пырля модынам. Сай результатым ончыктен омыл гынат, тиде мылам умбакыже вияҥаш шӱкалтышым ыштен. Тыге 1991 ийыште район первенствыште эн виян шахматист-влак дене модмаште икымше верыш лектынам. Тунамак мыйым районын сборный командышкыже пуртеныт.
Спортын тиде видшылан шӱмаҥмыже тудлан ончыкылык профессийым налмаштат кугун полшен. Морко посёлкысо 1-ше №-ан школым тунемын пытарымеке, рвезе МарГУ-што кӱшыл шинчымашым налын. Дипломан лиймекыже посёлкысо 2-шо №-ан школышто математикым туныктен.
1999 ийыште армий гыч пӧртылмекыже, Олег Геннадиевич паша корныжым Федеральный казначействе системыште тӱҥалын да кызытат ты направленийыштак тырша. 2023 ий марте Морко районысо пӧлкаште ыштен, а кызыт – Федерал казначествын Марий Элысе пӧлкажын вӱдышӧ специалист-экспертше.
Шахмат дене модмаш тудын хоббишкыже савырнен. Управленийын лӱмжым тӱрлӧ таҥасымашлаште эреак арала да сеҥышыш лектеш.
Российысе кугыжаныш кучемын да ведомствын организацийже-влакын пашаеҥыштлан эртаралтше «Гослига» таҥасымашын финалыштыже 2023-2025 ийлаште участвоватлен. 2023, 2024 ийыште Федеральный казначействын командыже кокымшо онлайн-этапыште финалыш лектын. Тыге элысе эн виян 20 команде очный турын участникше лийын. Участник-влак, нунын коклаште Олег Геннадиевичат, сай результатым ончыктеныт да шке тӱшкашт дене эн сай куд сборный команде радамыш пуреныт.
Морко районышто шахмат, шашке дене модмашым вияҥдымаште Олег Ивановын надырже моткоч кугу. Эртарыме таҥасымашке тӱрлӧ район, тыгак Татарстан, Чуваш республикла гыч чолга еҥ-влакым чумыра. Шкеже – районысо «Смена» командын участникше. Ты командынат сеҥымашыже ий гыч ийыш шукемеш.
Олег Геннадиевич ик жап Морко районысо йоча да самырык-влаклан спорт школышто тренер-преподавательлан тыршен, шахмат секцийым вуйлатен. Пашам ыштыме пагытыштыже воспитанникше-влак шуко вере призёр лийыныт, а кок тунемшыже шахмат дене икымше спорт разрядым налын.
Жапше лийме семын шкежат шахмат, шашке турнирлаште уш-акылжым терга.
Справке
Олег Иванов – шахмат дене спорт мастерыш кандидат. Республикысе чемпионатыште шуко гана призёр лийын, а 2020 ийыште сеҥышыш лектын. 1998 ий гыч тачысе кече марте Морко районышто шахмат дене 22 гана, а шашке дене 11 гана чемпион лийын. Татарстан Республикыштат шахмат-шашке двоеборьеште шуко гана сеҥышыш лектын.
Алевтина БАЙКОВА
Фотом еш альбомжо гыч налме
