Медведево поселкысо «Медведи» йоча регби клуб У ий каныш кечылаште Пензыште эртыше всероссийский турнир гыч сеҥымаш дене пӧртылын.
Тиде клубым Марий Элысе УФСИН-ын «Ястреб» специальный назначениян отделын пашаеҥже Алексей Ульянкин яра жапыштыже вуйлата (тудын нерген ме шукерте огыл возенна ыле – авт.).
Рошто турнирыште Москва, Подмосковье, Новгород, Тверь, Пенза, Татарстан, Марий Эл чылаже 29 команде вийжым терген.
«Медведи» командыште 2006-2007 ийлаште шочшо рвезе-влак модыт. Ты турнирыште нуно кум соперникыштым тӱрыс налмаште 130:0 счет дене сеҥеныт. Пелефиналыште Марий Эл гыч рвезе-шамыч Пенза гыч «Спартак» командымат 25:0 счет дене ончылтеныт.
Ынде рвезе-влак Тунемше-влакын всероссийский кубокыштлан ямдылалташ тӱҥалыт. Тудо тений июньышто Йошкар-Олаште лийшаш.
А.Канатеев,
Л.Камалетдинова.