СПОРТ

Канаш огыт ярсе

Сулен налме канышыш лекше-шамычым физический культур да спортлан кумылаҥдаш РФ Спорт министерстве 24-27 августышто Уфаште пенсионер-влакын VI спартакиадыштым эртара.

Участник-шамыч иймаште, ӱстембал теннис дене, шахмат дене модмаште, лӱйылтмаште, куштылго атлетикыште, эстафетыште, дартсыште таҥасат. Тыгак ГТО всероссийский физкультурно-спортивный комплекс нормативым сдатлат.

Марий Элын сборный командыштыже регионнан тӱрлӧ кундемже гыч кандаш еҥ (ныл ӱдырамаш, ныл пӧръеҥ) вийжым терга.

Нунын коклаште Светлана Егошина (Йошкар-Ола, стембал теннис), Марат Ханафеев (Волжский район Алексеевский села, иймаш), Сергей Смирнов (Йошкар-Ола, шахмат), Любовь Новосёлова (Марий Турек район Сысоево, шахмат), Валериан Романов (Морко район Чодраял, куштылго атлетике), Любовь Глушкова (Йошкар-Ола, лӱйылтмаш), Павел Усов (Звенигово район  Кокшайск села, лӱйылтмаш), Светлана Пайгашева (Морко район  Унчо села, куштылго атлетике) улыт. Нуно региональный этапын сеҥышыже улыт, чыланат спорт опыт, пеҥгыдылык дене ойыртемалтыт.

Марий Элыште спорт самырык-влак коклаште веле огыл, илалше-шамыч коклаштат ик эн тӱҥ верым налеш манаш келшен толеш. Лач тидын нергенак ик гана веле огыл шке выступленийыштыже элнан президентше В.Путин ойлен.

Марий Эл гыч спортсмен-влак мер илышыштат чолгалыкым ончыктат. Мутлан, Морко кундем гыч С.Пайгашева ятыр ий школышто дыр-рвезе-влакым таза илыш-йӱлалан, физкультур ден спортлан кумылаҥда, шкежат тӱрлӧ таҥасымашлаште вийжым терга, ончыкылык тукымлан – сай пример. Ты район гычак В.Романов – Арын школын ончычсо опытан физрукшо, ветеран-спортсмен, куштылго атлетике дене СССР-ын спорт мастерже, республикын рекордсменже.

Спартакиадын участникше-влак дене газетнан лишыл номерлаштыже палыме лийын кертыда.

Е.Эшкинина.

 

Опубликовать в Одноклассники

Добавить комментарий