СПОРТ УВЕР ЙОГЫН

Вес таҥасымаште – спортын чыла видше дене

20 июльышто, каныш кечын, Марий Эл вуйлатыше Александр Евстифеев Инвалид-влакын III всероссийский кеҥеж спартакиадыштлан ямдылалтме да тудым эртарен колтымо шотышто оргкомитетын погынымашыжым эртарен.

Регион вуйлатыше погынымаш тӱҥалме деч ончыч вигак палемден: мероприятий тунам мучашлалтеш, кунам мемнан республик гыч пытартыш делегацийже кая.

— Уна, спортсмен да нуным ужатен коштыктышо-влак кокла гыч эше шукынжо республикыштына улыт. Сандене культур да экскурсий программе-влак эртаралтыт. Шукынжо кастене каят. Чылан куаныше кумылан, эсогыл мурым мурен, мемнан дене чеверласат. Тидын гоч ме умылена, участник-влак тыште лиймыштлан да сай результатыш шумыштлан йывыртеныт. Южо команде кодшо кечылаште кайышаш ыле, но спартакиадым мучашлыме пайремыш кодаш манын, билетыштым вашталтеныт. Тугеже нунылан мемнан дене пеш келшен, а тидыже Марий республиклан эшеат сай, — палемден регион вуйлатыше эртыше шуматкечын.

Молодежный политике, спорт да туризм министр Лидия Батюкова спартакиадыштын финал таҥасымаштыже Российын 65 регионжо гыч 2028 участникын лиймыж нерген ойлен. Тушечын 1278 спортсмен, 196 судья, 554 тренер да ужатен коштыктышо, 71 спортсмен коляске дене куснылын.

Спартакиадым ямдылыме да эртарен колтымаште лӱмын туныктымо 350 волонтёр пашам ыштен. Чыла делегацийлан республикысе министерствыла ден ведомствыла гыч еҥым пеҥгыдемденыт.

Вузын тӱшкагудылашкыже 1865 участникым илаш пуртымо. Уна-влакым МарГУ-н, «Волгатехын», строительный техникумын столовыйлаштышт, «Мередиан» ден «Спортивный остров» кафелаште пукшымо. Нине верыштак спортсмен-влакын ача-авашт, судья-влак кочкыныт.

Таҥасымаш жапыште участник-влакым лӱмын келыштарыме автотранспорт ик вер гыч весыш шупшыктен. Тидын шотышто нимогай нелылык лийын огыл.

МВД, Росгвардий пашаеҥ-влакат, медперсонал-шамычат шке сомылыштым сайын шуктеныт.

Спартакиаде жапыште 2775 еҥлан 149 экскурсий эртаралтын. Спорт таҥасымашым почмылан да петырымылан эртаралтше пайрем годым выставкыш Социально вияҥмаш да Образований да науко министерстве-влакын 12 учрежденийышт ушнен.

«Дружба» стадинышто теннис корт воктене да «Марий Эл» ий полат ончылно республикысе 13 район гыч усталык коллектив культур программым ончаш темлен.

Спартакиадым почмылан да петырмылан пӧлеклалтше пайремыште тӱвыра да сымыктыш учрежденийла гыч артист-влак, тыгак Спорт федерацийын спортсменже-шамыч мастарлыкым ончыктеныт.  Тушко чылаже 1170 еҥ ушнен.

Марий Эл вуйлатышын кӱштымыж почеш Йошкар-Оласе тоштерлашке кумылан кажне еҥ яра пурен кертын. Спартакиаде жапыште чылажге кум тӱжем еҥ миен.

Команде-влак коклаште Марий Эл — латкудымшо верыште. Мемнан-влак 16 медальым сеҥен налыныт: 5 шӧртньым, ныл шийым да 7 бронзым. Таҥастарен ончалаш гын, 2015 ийыште инвалид-влакын кокымшо спартакиадыштышт мемнан команде 6 медаль дене 23-шо верыште лийын.

Спартакиадыште 574 комплект награде, 20 комплект кубок модалтын.

Кугу спорт мероприятий жапыште участник-влак деч поро мут да тауштымо шомак-влак кочмо да таҥасымаш эртыме верла гычат лийыныт. Чыла нуно лӱмын палемдыме книгаш возен коденыт.

Кызыт субъектласе делегаций-влак мӧҥгышт каят. Теҥгече 400 участник Йошкар-Ола гыч кудалыныт, а таче 1277 еҥ кайышаш. Кум делегаций (чылаже 14 уна) — Белгород, Калининград областьла да Саха-Якутий Республик — эрла корныш тарванышаш.

Марий Эл вуйлатыше, докладым колыштмекыже, мемнан команде могай видыште таҥасен огыл рашемден да вес спартакиадылан ямдылалташ кӱлмо нерген ойлен.

— Министерстве лишыл жапыште спортын нине видше — бочча, голбол, церебральный паралич черан-влаклан футбол дене— ямдылалтме пашам тӱҥалшаш да командым чумырышаш. Ныл ий гыч мемнан спортсмен-влак Татарстаныште  эртаралтшаш таҥасымашке лекшаш улыт. Мутат уке, ме ынде кушкынна, вет шукерте огыл Марий Элын командыже спортын ик видышкыже веле ушнен ыле, садлан тиде пашам умбакыже шуйыман, — кӱштымашыж дене палемден регион вуйлатыше Лидия Батюковалан.

Спортсмен-влакын тӱшкагудышто илымышт нерген МарГУ-н да «Волгатехын» ректорыштын пашаштым жаплан шуктышо Олег Сидоров ден Игорь Петухов палдареныт.

Республикысе МВД полиций начальникын алмаштышыже Евгений Корец спорт мероприятийын эртыме, участник-влакын илыме да кочмо верлаштышт лӱдыкшыдымылык шотышто эскерыме пашан шукталтмыж нерген каласкален.

— Тендан да Росгвардийын пашажым сайлан шотлыман да ончыкыжым тидым шотыш налына да республикыште эртаралтше вес мероприятийлашкат ӱжаш тӱҥалына. Мутлан, вашке Бендериаде лиеш, варажым — сайлымаш, Марий Эллым ыштымылан 99 ий. Пытартышыже мыланна моткоч кӱлешан, вет ме республикнан курымаш юбилейжым пайремлаш ямдылалтына, — ешарен Александр Евстифеев.

Ушештарена,  тазалык шотышто экшыкан еҥ-влаклан III всероссийский кеҥеж спартакиадыште сокыр, соҥгыра, уш-акыл шотышто экшыкан да ошкылмо-тарванылме шотышто йӧсланыше 14 гыч 18 ияш ӱдыр-рвезе-влак таҥасеныт.

Самырык спортсмен-влак у кӱкшытыш шуаш тыршеныт, шукышт спорт мастерыш кандидатын нормативым шуктеныт, пеҥгыде койыш-шоктышан улмыштым ончыктеныт, тӱрлӧ нелылыкым ончыде, сеҥымашке шуаш тӧченыт.

Алевтина Байкова.

 

 

Д.Речкинын фотожо.

    

Опубликовать в Одноклассники

Добавить комментарий