Тудын «Эчу» лӱман икымше сылнымут произведенийже 1940 ий 24 июньышто лачшымак «Марий коммуна» газетыштына савыкталтын. Усталык корныжо лач мемнан газет гыч тӱҥалын манын кертына. Марий учёный, писатель, публицист, кусарыше, краевед Ким Кириллович Васинын шочмыжлан тений 14 мартыште 100 ий темын. Изарнян тудын илыме Эшкинин уремысе пӧрт пырдыжеш шарнымаш оҥам торжественно почыныт.
Тыге Йылмым, историйым да сылнымутым научнын шымлыше В.М.Васильев лӱмеш марий институт Ким Кирилловичын шочмо калыкшылан ыштен кодымо пашажым суапландарен. Шарнымаш мероприятийыште Марий Эл правительстве председательын икымше алмаштышыже М.Васютин, тӱвыра, савыктыш да калык-влакын пашашт шотышто министрын алмаштышыже И.Садовин, оньыжа Э.Александров, МарНИИЯЛИ директор Л.Григорьева, Россий писатель ушемын Марий Элысе пӧлкажын, Марий кугыжаныш университетын, Йошкар-Ола администрацийын, Шернур район администрацийын, землячествын еҥже-влак да молат лийыныт.
Айдемын уке лиймыжлан курым эртымекат, тудын нерген кажныжын каласымыже шуын, шуко поро мут йоҥгалтын. Ким Васинын кумда тӱняшончалтышан лиймыжым, шке шонымашыжым ма шымлымашыжым факт дене пеҥгыдемден да арален налын кертше семын тудым шарныше чыла гаяк еҥ палемдыш. Марий сылнымут дене кылдалтше 700 наре шанче научный пашам возен. СССР писатель-влак ушемын еҥже, филологий шанче кандидат, Марий АССР кугыжаныш премийын лауреатше (1976), «Марий АССР наукын сулло дятельже» (1978), «Марий АССР-ын калык писательже» (1984), «Чуваш АССР культурын сулло пашаеҥже» (1984), «Йошкар-Олан почётан гражданинже» (1993) чап лӱм-влак, «Знак Почёта» орден (1967) дене палемдалтын.
Шанче паша деч посна тудо Марий кундемын Российыш ушнымыж, XVII-XVIII курымлаште лийше кресаньык сар-влак, 1905-1907 ийласе революций дене кылдалтше событий-шамыч нерген шуко повесть ден ойлымашым возен.
Лӱмлӧ еҥым шарнен да пагален, тудлан мемориал оҥам почмашке Чуваш Республике гыч лӱмын шанчызе, писатель-влак толыныт. Чавайн, Мухин, Кырла, Колумб гай моло лӱмлӧ шкенан литераторна-влакын творчествышт нерген веле огыл тудо возен. «История советской многонациональной литературы», «История литературы народов СССР дооктябрьского периода», «Украинская советская энциклопедия» шуко томан книгам ямдылаш полшымо дене пырля Ким Васин чуваш, татар сылнымут классик-влакын творчествыштымат шымлен. Мутым налше чуваш журналын рекдакторжо Арсений Тарасовын палемдымыж почеш, марий ден чуваш писатель-влакын эре кылышт сай лийын. «Кызытат тендан пашадам савыкташ верым эре муына» манын ойлымыжо марий писатель-влакын чоныштым ырыктыш, очыни.
Каласен кодыман, Ким Васинын лӱмжым 2009 ийыште Йошкар-Оласе Звездный микрорайонысо ик уремлан, а 2015 ийыште Шернур районысо централизоватлыме книгагудо системылан пуымо.
С.Носова
Снимкыште: К.К.Васинлан шарнымаш оҥа.
Авторын фотожо
